"Sabah" Azərbaycan Premyer Liqasının XXVI turunda doğma meydanda "Qəbələ"ni 2:1 hesabı ilə məğlub edib.
Prosport.Az xəbər verir ki, Masazır təmsilçisinin yeni baş məşqçisi Krunoslav Renduliç matçdan sonra keçirilən mətbuat konfransında jurnalistlərin suallarını cavablandırıb:
– Oyundan öncə futbolçulara demişdim ki, çox ağır olacaq. "Qəbələ" yaxşı komandadır. Onlar turnir cədvəlində sonuncu pillədədir. Premyer Liqada qalmaq üçün mübarizə aparırlar. Evdə 2 oyun ardıcıl qalib gəlmək asan deyil. Oyunçularımı təbrik edirəm. Amma istəmirəm ki, onlar arxayınlaşsınlar. İlk hissədə yaxşı oynadıq. 2-ci hissədə isə həqiqətən də pis idik. Ən önəmlisi odur ki, 3 xal qazandıq.
– Komandada nələri dəyişə bildiniz?
– 4-3-3 sistemi ilə oynamağa üstünlük verdik. Deyə bilmərəm ki, çox şeyi dəyişmişik. İstəyirəm ki, orta xətt oyunçularımızdan biri daha çox irəli getsin. Bu, ilk hissədə yaxşı idi. 2-ci hissədə performansımız aşağı düşdü. Oyun ərzində bəzi şeyləri dəyişdik. Daha yaxşı olmalıyıq. Hazırda 3-cü yerdəyik. Zamanla inkişaf edəcəyik. Bunu əminliklə deyirəm. Bəzi problemlərimiz oldu. Amin Seydiyevin qızdırması var idi, son 2 məşqi buraxmışdı.
– Qarşınıza konkret hədəf qoyulub?
– Xeyr. Mən özüm öz qarşıma məqsəd qoymuşam. Komandamızın potensialı var ki, mövsümü 2-ci pillədə bitirsin. Futbolçulara dedim ki, böyük məqsədləriniz varsa, bunu edə bilərsiniz. İnanıram ki, mövsümü 2-ci pillədə bitirə biləcəyik. Qarşıda 10 oyun var. Bu da 30 xal deməkdir.
– Azərbaycanda bir çox xorvatiyalı məşqçi, futbolçu çıxış edib. Bura gəlmədən öncə kiminlə əlaqə saxladınız?
– Səmimi olmaq lazımdır. İlk olaraq Jelko Sopiçə ("Sabah"ın ilk əcnəbi baş məşqçisi) zəng etdim. O mənə klub haqqında müsbət fikirlər söylədi. Təklif etdi ki, bu şansdan istifadə edim. Robert Prosineçkiyə də zəng etdim. Biz dostuq. O da çox yaxşı şeylər dedi.
– Əlinizdə olan heyətdən məmnunsunuz? Komandadan gedəcək futbolçular barəsində fikirləriniz var?
– Bu, bir prosesdir. Hər transfer pəncərəsində istəyirsən ki, daha da inkişaf edəsən. Bütün dünyada belədir. Əlbəttə ki, yayda bəzi dəyişikliklər edəcəyik. Bizdə icarədə olan futbolçular var. Bəzilərinin müqaviləsi bitir.