"Qəbələ" Azərbaycan Premyer Liqasının XXVI turunda səfərdə "Sabah"a 1:2 hesabı ilə məğlub olub.

Prosport.Az xəbər verir ki, "qırmızı-qaralar"ın baş məşqçisi Kaxaber Sxadadze matçdan sonra keçirilən mətbuat konfransında jurnalistlərin suallarını cavablandırıb:

– Texniki tərəfdən komandam yaxşı oyun nümayiş etdirdi. Hücumların yekunlaşması ilə bağlı problemlərimiz var. 3-4 metr məsafədən topu qapıya göndərə bilmirik. Digər məsələ isə odur ki, 75 dəqiqə oynayırıq. 75-ci dəqiqədən sonra ehtiyatdan girən futbolçular oyunu gücləndirməlidir. Bununla bağlı da problemlər var. Ümumi götürəndə yaxşı oynadıq. Pressinqi yaxşı edirik. Bunun nəticəsində qol vurduq. Rəqibin hücumçusu Davit Volkovi səviyyəli futbolçudur, Gürcüstan millisində oynayır.

– 3 oyuna çıxmısınız və hamısında məğlub olmusunuz. Düşünmürsünüz ki, gərək gəlməzdim?
– Evdə oturmaqdansa, işləmək yaxşıdır. Hələ ki karyeramı bitirmək fikrində deyiləm. Hara gəldiyimi bilirdim. Hər 3 oyunu pis oynamamışıq. Futbolçumuz 2 metrdən topu qapıya vura bilmirsə, burada söhbət ustalıq səviyyəsinin aşağı olmasından gedir. 

– Qapı xəttində rotasiya etmişdiniz. Bu nə ilə bağlı idi?
– 2 oyunda 7 qol buraxmışıq. 2-ci qapıçımız da var. Ona şans verməliyik ki, özünü göstərsin. Rəşad Əzizlinin bu gün kobud səhvi olmadı. Amma elə anlar olur ki, qapıçı komandanı xilas etməlidir.

– Gözəl oyun olsa da, nəticə yoxdur. Çıxış yolunu nədə görürsünüz?
– Əlbəttə ki, yaxşı oyuna görə xal vermirlər.