"Kəpəz" Azərbaycan Premyer Liqasının XXVI turunda Tovuz şəhər stadionunda "Neftçi" ilə 3:3 hesablı heç-heçə edib.

Prosport.Az xəbər verir ki, Gəncə təmsilçisinin baş məşqçisiAdil Şükürov oyundan sonra keçirilən mətbuat konfransında jurnalistlərin suallarını cavablandırıb:

– Azarkeşlərimizə təşəkkür edirəm. Qalib də gələ bilərdik. Üstün olduğumuz anlarda qollar buraxdıq. Amma deyərdim ki, bu gün 1 xal qazandıq. Maraqlı derbi alındı. Komandama təşəkkür edirəm. Futbolçular əziyyət çəkdi, sona kimi vuruşdular. Bizə lazım olan 1 xalı qazandıq. Məqsədimiz Premyer Liqada qalmaqdır. Bunun üçün də xallar qazanmalıyıq.

– Rəqib baş məşqqçi bildirdi ki, "Kəpəz" bundan sonra oyunlarını Sumqayıtda keçirəcək. Bu nə dərəcədə həqiqətə uyğundur?
– Belə bir şey yoxdur. Bilmirəm ki, bu fikir haradan çıxıb. "Azərsun Arena" haqqında nəsə desəydilər, inandırıcı olardı. Rəhbərliklə bu barədə danışırıq. Stadion axtarırıq. Hansı bizə uyğun olsa, orada oynayacağıq. Sumqayıt bizim üçün uzaqdır. Futbolçular üçün asan yollar axtarırıq.

– Bu gün Filip Ozobiç "Kəpəz"ə 3 qol vurdu. Müdafiəçiləriniz onun qarşısını ala bilmirdi?
– Heç bir komandaya qarşı xüsusi tapşırıq vermirik. Sadəcə, diqqətsizlik oldu ki, Filip Ozobiç bu gün 3 dəfə fərqləndi.

– Siz gələndən sonra "Kəpəz"də məhsuldarlıq artıb. Bunu necə bacardınız?
– Komanda hücum etməyi bacarmalıdır. Amma müdafiədə problemlər var, çox qol buraxırıq. Bunun üzərində işləməliyik. Xoşbəxtliyi daha çox rəqib qapısında axtarmağa çalışırıq.

– Giorgi Papunaşvili "Sumqayıt"la oyunda əvəzlənərkən etiraz etmişdi. Onun bu gün oynamaması həmin olayla bağlı idi?
– Bununla bağlı deyil. Onu əsas heyətdə düşünmüşdük. Matçdan əvvəl dedi ki, qasıq nahiyyəsində ağrı hiss edir. Bu gün onu qorumaq istədik. Bütün futbolçularımıza inanırıq. 

– Adama Nyan nə vaxta qədər əvəzedici heyətdə qalacaq?
– Onun əsas komandadan göndərilməsi daxili nizam-intizamla bağlı idi. Hələ ki orada qalacaq.