"Bilirdik ki, oyun çətin olacaq. Qrup mərhələsindən bu rəqibi tanıyırdıq. "Qarabağ"a "respekt" düşür, yaxşı komandası, yaxşı futbolçuları var. Ancaq digər tərəfdən futbol 90 dəqiqədir. Düşünürəm ki, 2-ci hissədə göstərdiyimiz oyunla heç-heçəyə layiq idik".
Prosport.Az-ın xəbərinə görə, bunu Almaniyanın "Bayer" klubunun futbolçusu Qranit Caka deyib.
İsveçrə millisinin Kosovo əsilli oyunçusu oyuna əlavə olunmuş dəqiqədə vurulan qolla heç-heçə etdiklərinə görə şad olduğunu bildirib: "Bilirdik ki, "Qarabağ" öz meydanında daha aqressiv futbol sərgiləyir. Bu komandanın yaxşı futbolçuları, yaxşı məşqçisi var. Birə-bir oynamağı bacaran keyfiyyətə malik komandadır. Belə komandalara qarşı oynamaq həmişə çətindir. Ancaq biz də bu oyuna yaxşı hazırlaşmışdıq. 90 dəqiqənin sonunda heç-heçə etdiyimizə görə şadıq".
31 yaşlı dayaq yarımmüdafiəçisi martın 14-də Leverkuzen şəhərində keçiriləcək cavab qarşılaşmasında daha fərqli oyun nümayiş etdirəcəklərini qeyd edib: "Ümid edirəm ki, 2-ci oyun fərqli olacaq. Onlar artıq bizim nəyə qadir olduğumuzu, evdə azarkeş dəstəyi altında necə oynadığımızı bilir. Bizə Leverkuzendə başqa cür oynamaq lazım gələcək. Ümidvaram ki, daha keyfiyyətli oynayıb, 90 dəqiqənin sonunda mərhələni keçən tərəf biz olacağıq".
Qeyd edək ki, Qranit Caka "Qarabağ"a qarşı 3 dəfə "Bayer"lə forma geyinsə də, 2018-ci ildə "Arsenal"la oyunlarda meydana çıxmayıb. Bununla belə, o, 2 dəfə "Arsenal"la (1 dəfə "Qarabağ"a qarşı ehtiyatda qalıb, 1 dəfə isə "Çelsi" ilə UEFA Avropa Liqası final matçında oynayıb), 2 dəfə də "Bayer"lə Bakıya gəlib. O, Bakıda keçirdiyi 3 oyunda 1 qələbə, 1 heç-heçə və 1 məğlubiyyətlə üzləşib.
Səbuhi Musa