İngiltərə çempionatı həvəskarları arasında keçirilən “Fantasy Premier League” yarışının qalibi müəyyənləşib.

Prosport.Az xəbər verir ki, 11 milyon insanın qatıldığı oyunda həmyerlimiz Əli Cahangirov bütün rəqiblərini üstələyib. O, 2776 xalla hamı üçün əlçatmaz olub.

33 yaşlı Əli Cahangirov Bakı sakinidir. Ötən ay hələ "Fantasy"də 1-ci sırada olarkən "Newsbeat"in reportyorları ondan müsahibə götürüb. "FPL Gunz" adı ilə yarışa qatılmış həmyerlimizin Britaniya mətbuatına verdiyi açıqlamanı təqdim edirik:

"Fantasy"də 1-ci sırada olmağım bir az şansa bağlı məsələdir. Ancaq bir az öncəki turları planlaşdırmağımın, bütün komandaların xəbərləri, futbolçuların zədə durumları ilə maraqlanmağımın və Premyer Liqa oyunlarını izləməyimin mənə kömək olduğunu etiraf edirəm.

Azərbaycanda “Arsenal”, “Mançester Yunayted”, hətta “Liverpul” və “Çelsi” kimi komandaların böyük fanat ordusu var. Bir çox azarkeş Premyer Liqanı izləyir və hər adi oyuna kimi baxır. Mən ömürlük "Arsenal" azarkeşiyəm, ona görə də bu mənim üçün sual deyil. Qalib gəlsəm, mütləq "Arsenal"ın oyununu izləyəcəyəm.

Əminəm ki, "Arsenal" bu mövsüm çempion olacaq. "Mançester Siti" bizim arxamızdadır, amma əminəm ki, biz onu üstələyə bilərik" (düzdür, sonradan "Arsenal" liderliyi "Siti"yə uduzdu – red.).

Qeyd edək ki, “Fantasy Premier League”dı iştirakçı virtual büdcə daxilində daha yaxşı performans göstərəcəyini hesab etdiyi 15 futbolçudan ibarət heyət qurur və turnir ərzində onların çıxışına görə xallar qazanır, yaxud itirir. Qalib üçün pul mükafatı nəzərdə tutulmasa da, 1-ci yeri tutan üçün Böyük Britaniyada 7 gecə qalma və növbəti mövsümün 2 Premyer Liqa matçını izləmə şansı əldə edir.