"Azarkeşlərə təşəkkür edirəm. Bu gün əsl futbol ab-havası var idi. Oyunçulara da minnətdarlığımı bildirirəm".

Prosport.Az xəbər verir ki, bunu "Qarabağ"ın baş məşqçisi Qurban Qurbanov Bakıda Almaniyanın "Bayer" klubu ilə heç-heçə (2:2) etdikləri UEFA Avropa Liqasının 1/8 final mərhələsinin ilk oyunundan sonra mətbuat konfransında deyib.

51 yaşlı mütəxəssis görüşün sonlarında futbolçularda yorğunluğun hiss edildiyini bildirib: "Qələbə də qazana bilərdik. Avropa ölkələrində rəhbərlər, futbolçular dəyişir, amma mexanizm davam edir. Bu önəmlidir. Bizim üçün asan deyil. Daha möhkəm olmaq üçün atacağımız addımlar vacibdir. Hər halda, Almaniya futbolu bu gün bizdən öndədir. 10-15 ildən sonra hansısa nəticəni verə bilərik. Məncə, ölkələri müqayisə etməyək, işimizi yaxşılaşdırmağa çalışaq".

Baş məşqçi məyus olmadığını vurğulayıb: "Səfərdəki matça daha ciddi hazırlaşmalıyıq. Oyunçuların daha sağlam və hazırlıqlı olması önəmlidir. Böyük uğurlar üçün nəhəng klublara da qalib gəlmək lazımdır. Hardasa bu səviyyəyə yaxınlaşa biləcəyik".

Qurban Qurbanov səfərə ümidsiz getməyəcəklərini sözlərinə əlavə edib: "Bəlkə də oyundan əvvəl ən çox inamlı olan mən idim. Zəng edib mənə deyirdilər ki, bilirik, rəqib güclüdür, məğlub olsanız da, üzülməyin. Ancaq mən bu rəqibə qarşı Bakıda nəticə qazanacağımıza inanırdım. Komandanı daha yaxşı mübarizə üçün hazırlayacağam. Amma nəzərə almalıyıq ki, Almaniya komandaları heç bir matçda meydana rahat çıxmır".

Təcrübəli mütəxəssis görüşdə zədələnən Juninyunun durumunun ciddi ola biləcəyini deyib. O, hücumçunun vəziyyətinin sabah dəqiqləşəcəyini söyləyib.