"Sabah"ın yeni baş məşqçisi Krunoslav Renduliç kluba təyinatından danışıb.

Prosport.Az xəbər verir ki, mütəxəssis paytaxt təmsilçisinin saytına açıqlamasında əvvəlcə öz uğurlarından söz açıb:

“Burada olmaqdan şadam. 40 yaşıma qədər davam edən futbolçu karyeram Xorvatiya ilə bağlıdır. Futbolçu karyeramı başa vurduqdan sonra məşqçiliyə başladım. İlk 2 ilimi İranda – "Fulad Xuzestan" klubunda keçirdim. 2018-ci ildən baş məşqçi kimi fəaliyyət göstərməyə başladım. Həmin vaxtdan Xorvatiyanın bir neçə klubunu çalışdırdım. Sonuncu iş yerim Bosniya və Herseqovina "Jrinski"si olub. Qürurla demək istəyirəm ki, bu klubla həm çempionluğu, həm də ölkə kubokunu qazandım. Bundan əlavə, biz avrokubokların qrup mərhələsinə yüksələn ilk Bosniya və Herseqovina klubu olduq, tarix yazdıq".

O, qarşıya qoyduğu hədəflərdən də danışıb: "Futbolçular üçün zehni və fiziki güc çox vacibdir. Mən özüm futbolçu kimi istəkli olmuşam. Bu cür oyunçular xoşuma gəlir. Hətta istedadlı futbolçulara da uğur qazanmaq üçün istək və əzm lazımdır.

İlk işə başladığım gündən hədəflərim var idi. Mən o hədəflərə yüksək səviyyədə nail olmaq istəyirəm. Həyatda olduğu kimi, futbolda da qarşınıza kiçik hədəflər qoymağınız sizi böyük hədəflərə çatdırmayacaq. Ancaq böyük hədəflərə köklənməklə bu mövsüm məqsədə nail olmaq olar. Ona görə də düşünürəm ki, iddialı olmalı və bu mövsüm 2-ci yer uğrunda mübarizə aparmalıyıq. Məncə, buna nail olmaq üçün kifayət qədər güclü komandamız var. Sadəcə, bir söz demək istəyirəm: çalışacağıq, mübarizə aparacağıq və daim istəkli olacağıq".

Qeyd edək ki, "Sabah" Krunoslav Renduliçlə 1,5 illik müqavilə bağlayıb.