"Qarabağ"ın 15 yaşadək komandası AFFA U-15 Liqasında növbəti qələbəsini qazanıb.

Prosport.Az-ın xəbərinə görə, XXII turda "Qarabağ" klubunun oktyabrdan əməkdaşlıq etdiyi EFA-nın (European Football Academy) komandası ilə qarşılaşıb. "Köhlən atlar" ötən tur olduğu kimi, bu rəqibini də eyni hesabla darmadağın edib – 6:0.

Matç ilk dəfə "Qarabağ"ın baş sponsoru "Azərsun"un Binə qəsəbəsindəki ərazisi sayılan SABIS SUN Beynəlxalq Məktəbin təbii ot örtüyü olan meydançasında baş tutub. Oyunu FIFA dərəcəli referi, VAR koordinatoru Fəridə Lütfəliyeva idarə edib.

Baxmayaraq ki, bu matçda komandanın əsas qapıçısı Bilal Hacıyev xəstələndiyi, kapitan Uğur Qurbanlı zədələndiyi üçün meydana çıxmayıb, rəqib ilk hissədə, demək olar ki, "Qarabağ"ın qapısı önündə qeyri-adi təhlükəli vəziyyəti ilə yadda qalmayıb. Vüqar Əsgərlinin baş məşqçisi olduğu komanda ötən tur "Turan Tovuz"la matçdakı ssenarini təkrarlayıb. Belə ki, "köhlən atlar" ilk hissədə 4, fasilədən sonra 2 qol vurub.

Əli Bəşirov 14 və 39-cu (penalti) dəqiqələrdə dubl edib. Polad Hüseynov 20-ci, Hüseyn Bayramov 27-ci, Riad Qaradağlı 59-cu və Xəzər Nağızadə 79-cu (penalti) dəqiqədə fərqlənib. 

Xatırladaq ki, tərəflərin oktyabrın 14-də Milli Aviasiya Akademiyasının stadionunda keçirilmiş ilk oyununda da "Qarabağ" bu rəqibini daha böyük hesabla darmadağın etmişdi – 9:2.

Qeyd edək ki, "Qarabağ" hazırda 57 xalla turnir cədvəlinin lideridir.