Azərbaycan millisinin daha 2 boksçusu İtaliyanın Busto Arsitsyo şəhərində keçirilən I Dünya Olimpiya Təsnifat Turnirində mərhələ adlayıb.

Federasiyadan Prosport.Az-a verilən məlumata görə, Zeynəb Rəhimova (54 kq) 1/32 finalda əlcəzairli Fatma Zöhrə Əbdülkadirlə döyüşüb.

Qarşılaşma boksçumuzun qələbəsi ilə yekunlaşıb. Rəhimova rəqibini 3:1 (29:28, 30:27, 29:29, 30:27, 28:29) hesabı ilə məğlub edib. Yığma üzvü növbəti qarşılaşmada ilk mərhələdən azad olan Aqerie Emaqnu Bayevlə (Efiopiya) üz-üzə gələcək. Görüş martın 7-də keçiriləcək.

Ümid Rüstəmov (57 kq) isə qələbəni vaxtından əvvəl bayram edib. O, Navvaf Əl-Zəhmiyə (BƏƏ) ilk raundda nokautla qalib gəlib. Rüstəmov 1/16 finalda Şaffi Bakari (Keniya) ilə gücünü yoxlayacaq. Görüş martın 8-də baş tutacaq.

Qeyd edək ki, yarışın ilk günündə boksçumuz Nicat Hüseynov (51 kq) da qələbə qazanaraq mərhələ adlayıb. Turnirin 3-cü günündə millimizin daha 2 boksçusu rinqə çıxacaq.