“Qarabağ”ın futbolçusu Bəhlul Mustafazadə Azərbaycan Premyer Liqasının XXV turunda “Neftçi”yə 4:1 hesabı ilə qalib gəldikləri oyundan sonra jurnalistlərə açıqlama verib.

Prosport.Az xəbər verir ki, müdafiəçi əvvəlcə oyun haqda təəssüratları ilə bölüşüb: "Düşünürəm ki, bütün tamaşaçılar üçün maraqlı oyun oldu. Hesab onların da xeyrinə bitə bilərdi. Amma biz daha diqqətli olduq və vacib oyundan qabaq qələbə qazandıq".

O, "Neftçi" ilə matçın çətin keçdiyini qeyd edib: "Gərginlik var idi. 2-ci qolu vurub hesabı bərabərləşdirə bilərdilər. Rəqibi əks hücumlarda yaxaladıq və 3-cü, 4-cü qolları vurduq. Düşünürəm ki, bərabər səviyyəli oyun keçdi. Lakin biz əlimizə düşən fürsətləri daha yaxşı dəyərləndirdik". 

B.Mustafazadə "Neftçi" ilə matçın UEFA Avropa Liqasının 1/8 final mərhələsində "Bayer"lə oyuna müsbət təsir edəcəyini bildirib: "Bayer"lə görüşdən öncə belə bir oyuna, derbiyə çıxmaq çox önəmli idi. Düşünürəm ki, yaxşı mübarizə apardıq. Amma bəzi səhvlərimiz var idi ki, onları analiz edib "Bayer"lə oyundan əvvəl aradan qaldırmağı çalışacağıq".

27 yaşlı müdafiəçi "Turnir cədvəlində böyük fərqlə 1-ci yerdə olan komanda növbəti oyunlara necə motivasiya olur?" sualına belə cavab verib: "Onu Qurban müəllim daha yaxşı bilir. O bizə daha yaxşı motivasiya verə bilir. Heç bir şeydən asılı olmayaraq, bütün oyunlara daha diqqətli, daha yaxşı çıxmağı və öz idman formamızı qorumağı tapşırır. Düşünürəm ki, bundan sonra da motivasiya tapacağıq". 

Bəhlul Mustafazadə bu görüşdən sonra "Bayer"i daha yaxından analiz edəcəklərini bildirib: "Fərdi olaraq bütün oyunçular imkan tapdıqda izləyir. Ümumiyyətlə isə onlar bizə tanışdır. Bu oyundan sonra hazırlıq mərhələsində daha yaxından tanış olacağıq. Məşqçilər rəqib haqqında daha çox məlumat verəcək". 

"Qarabağ"ın mərkəz müdafiəçisi "Bayer"lə qrup mərhələsindəki oyundan sonra hər iki komandanın gücləndiyini bildirib: "Düşünürəm ki, daha yaxşı olublar. Biz də daha çox inkişaf etmişik. Hesab edirəm ki, bizi daha maraqlı və daha gərgin oyun gözləyir".