"Çox istəkli komandaya qarşı oynadıq. Bəlkə də tam istədiyimiz kimi matça nəzarət edə bilmədik. Futbolçuları təbrik edirəm. Azarkeşlər üçün də yaxşı görüş oldu. Stadionda yaxşı ab-hava var idi".

Prosport.az xəbər verir ki, bunu "Qarabağ"ın baş məşqçisi Qurban Qurbanov "Neftçi"yə 4:1 hesabı ilə qalib gəldikləri Premyer Liqanın XXV turunun oyunundan sonra mətbuat konfransında deyib.

51 yaşlı mütəxəssis 2 qolu son dəqiqələrdə əks-hücumlardan vurduqlarını xatırladıb: "Rəqibin itirəcəyi bir şeyi olmadığı üçün son dəqiqələrdə irəli atılmışdı. Çempionatda xal fərqi 23 olsa da, futbolçu ritmdən düşməli deyil. Hansısa oyunçunun praktikasının azalmasını da istəmərəm. Potensiallı gənclərə növbəti qarşılaşmalarda şans verə bilərəm".

Təcrübəli baş məşqçi rəqib azarkeşlərə təşəkkür edib və "Neftçi"yə hər zaman hörmətinin olduğunu söyləyib.

Qurban Qurbanov növbəti matçlara daha ciddi hazırlaşacaqlarını sözlərinə əlavə edib.