"Sumqayıt" Azərbaycan Premyer Liqasının XXV turunda doğma meydanda "Kəpəz"ə 1:3 hesabı ilə məğlub olub.

Prosport.Az xəbər verir ki, "kimyaçılar"ın baş məşqçisi Samir Abasov matçdan sonra keçirilən mətbuat konfransında jurnalistlərin suallarını cavablandırıb:

– Rəqibi təbrik edirəm. Oyunumuzda nələrin alınıb-alınmadığını indi deyə bilmirəm. Futbolçuların üzərinə getmək doğru olmaz. Çox üzgündürlər. Qələbə qazanmaq istəyirdilər. Planlaşdırmadığımız bir məğlubiyyətlə üzləşdik. Növbəti oyunlarda bunun əvəzini çıxmağa çalışacağıq. 

– Heyəti gücləndirmək istiqamətində addımlar atılacaq?
– Xordan Resabalanı transfer etmişik. Transfer məsələsində ciddi hərəkət etməlisən. Xordan son matçını dekabrda oynayıb. 2 aydır ki, futbolsuz qalıb. Məcburuq ki, çempionat oyunları ilə onu formaya salaq. Ehtiyat oyunçular skamyasının kasad olmağı bizə problem yaradacaq. Artıq bununla barışmalıyıq.

– Tribunalar boş idi. Sumqayıt sakinlərini stadiona necə cəlb etmək olar?
– Bu bizim futbolun problemidir, şəhərlərə bölməyək. Amma bir az sərt olacağam. Həmişəki kimi kimlərinsə xoşuna gəlməyəcək. Fan-klubumuza təşəkkür edirəm. Deyəcəklərimin onlara aidiyyatı yoxdur. Bu gün Sumqayıtda heç bir azarkeşin ixtiyarı yoxdur desin ki, niyə "Kəpəz"ə uduzdun. Bu ixtiyarın sahibi olmaq üçün gəlib komandanı dəstəkləmək lazımdır. Açılış matçında stadion dolu idi. Deməli, sən bura futbolçulara, komandaya görə yox, müğənnilərə, Hissə görə gəlmisən. Get, otur evində bax. Futbolçulara, komandaya nəsə demək istəyirlərsə, gəlsinlər stadionu doldursunlar. Açılış oyununda dəstəklərini göstərdilər. Gəlməyəcəklərsə, onlara görə uduzmayacağıq, özümüzə görə oynayırıq. Dünənə kimi stadion davası edən insanlar var idi. Bu cür stadion tikilib. Onlara görə oyunun vaxtını dəyiş ki, uyğun olsun. Oyuna 200 nəfər gəlir. Heç kimin danışmağa ixtiyarı yoxdur. Mən bunu bir sumqayıtlı kimi deyirəm.