"Qəbələ"nin Kaxaber Sxadadzeni baş məşqçi təyin etməsi bir qədər gözlənilməz xəbər oldu. Təyin olunan məşqçinin adı və bağlanılan müqavilənin müddəti (1,5 il) həm klubun, həm də bütövlükdə Azərbaycan futbolunun gələcəyi ilə bağlı müəyyən təhlillər aparmaq imkanı verir. Mövsümün əvvəlində "Qəbələ"nin prezidenti Fariz Nəcəfov verdiyi müsahibəsində demişdi ki, oyunçularla uzun müddətli müqavilə imzalamamalarının səbəbi klubun məhdud maliyyə imkanlarına sahib olması və dövlətin ayırdığı vəsaitdən asılı olmasıdır. Klubun I diviziona düşmə ehtimalının olması da bunun səbəblərindən biri idi. Əgər bu baş verərsə, klub dövlətin ayırdığı 3 milyon manatdan məhrum olacaq və avtomatik uzun müddətli müqavilələri olan futbolçulara ödəməli olduqları əməkhaqları ödəyə bilməyəcəkdi. Lakin Kaxanın təyinatı vəziyyətin dəyişməsinə işarədir.

Gürcü mütəxəssisin qısa müddət ərzində nəticələri düzəldəcəyi və aradakı 8 xallıq fərqi qapadacağı inandırıcı görünmür. Yəni komandanın bu mövsüm APL-də yerini qoruyacağı ehtimalı çox azdır. Onun uzun müddət tanıdığımızdan iddiasız və növbətti mövsümdən I divizionda çıxış etmək ehtimalı yüksək olan bir kluba rəhbərlik etməyə razı olmayacağını da bilirik. Üstəlik bağlanılan müqavilənin müddətinə əsaslanaraq deyə bilərik ki, Kaxanın təyinatı bu mövsümə yox, növbətti mövsümə hesablanıb.

Eyni zamanda bilirik ki, hazırda Azərbaycan klubları 2 hissəyə bölünüb: hazırkı AFFA rəhbərliyi tərəfindən nəzarət edilən klublar və müstəqil klublar. Birincilər futbolumuzu idarə edənlərin sevimliləri, ikincilər düşmənləridir. Hakimlərin klublara olan münasibətlərindən bunu sezmək olar. "Qəbələ" ikincilərin sırasındadır. Yuxarıda qeyd etdiklərimə əsaslanaraq bəzi iddialar irəli sürmək olar. Bir müddətdir ki, növbətti mövsümdən APL-dəki klubların sayının artırılacağı, 12 və ya 14-ə çatdırılacağı, APL-i heç bir klubun tərk etməyəcəyi, əvəzində isə diviziondan yüksək liqaya 2 və ya 4 klubun qalxacağı iddia edilir. "Qəbələ"nin bu təyinatına əsaslanaraq bu iddiaların doğru olması ehtimalının yüksək olduğunu təxmin edə bilərik.

Bundan başqa, ötən mövsüm sonunda "Qəbələ"nin maliyyə imkanlarının artacağı ilə bağlı proqnozlar var idi. Bəzi mənbələr Tale Heydərovun yenidən klubun büdcəsini əhəmiyyətli dərəcədə artıracağı, digərləri Qətərdən olan sponsorların klubu satın alacağını iddia edirdi. Lakin bunların heç biri baş vermədi və yuxarıda qeyd etdiyim kimi, bu mövsümün əvvəlində klubun prezidenti Fariz Nəcəfov müsahibəsində klubun maddi imkanlarının yüksək olmadığını dedi. Amma Sxadadze çapında bir məşqçi ilə uzun müddətli müqavilənin bağlanması, ötən mövsümün sonunda klubun gələcəyi ilə bağlı iddiaların doğru olması ehtimalını artırır.

Bu təyinat bütövlükdə Azərbaycan futbolunun gələcəyi barəsində də müəyyən fikirlər irəli sürməyə şərait yaradır. Martda AFFA-da prezident seçkiləri baş tutacaq. Bu seçkilərə ümidlər böyükdür. Seçki nəticəsində Azərbaycan futbolunu 10 ildən çoxdur ki, məhv edən, müstəqil klublara rahat nəfəs almağa imkan verməyən adamların nəhayət ki futbolumuzdan gedəcəyinə və sağlam qüvvələrin futbolumuza rəhbərlik etməyə başlayacağına ümidlər böyükdür. Hələ ki rəsmi şəkildə heç kim öz iddiaları haqqında danışmasa da, mətbuatda AFFA-nın növbəti prezidenti olmaq iddiasında olan bir neçə nəfərin adı çəkilir.

Yuxarıda qeyd etdiyim kimi, "Qəbələ" AFFA-dakı mövcud hakim qüvvələrin sevmədiyi klublardan hesab edilir. Kaxanın təyinatı bu qüvvələrin AFFA-da son günlərini yaşadıqlarına bir işarə ola bilər. Bütövlükdə Sxadadze təyinatı həm "Qəbələ", həm futbolumuz adına müsbət siqnallar ötürür. "Qəbələ" yarandığı gündən Azərbaycan futbolunun ən perspektivli layihəsi idi. Sadəcə, klubun çempionluq mübarizəsinə girişməyə tələsməsi sonda mənfi nəticələrə səbəb oldu və mövcud durum yarandı. Bundan başqa, mövcud futbol "başbilənlər"imizin müstəqil klublara vurduqları badalaqlar da öz rolunu oynadı. Eyni zamanda rayon əhalisinin kluba az diqqət göstərməsi də klubun layihələrinin yarımçıq qalmasına səbəb oldu. Düşünürəm ki, klub ad seçimində də yanlışlığa yol verib. Futbol klubuna sırf bir rayonun adının verilməsi onun azarkeş kütləsinə ciddi təsir göstərir və onu bir rayon çərçivəsində lokallaşdırır.

Ümid edirəm ki, əgər yuxarıda yazdığım ehtimallar doğrudursa, "Qəbələ" rəhbərliyi keçmişdəki səhvlərini təkrarlamaz və bu dəfəki "Qəbələ" layihəsi qısamüddətli yox, ömürlük olar. Sonda onu qeyd etmək istəyirəm ki, futbolumuzun gələcəyinə ümidlər böyükdür. "Qarabağ"ın uğurları, "Turan Tovuz", "Sabah" (hazırda onlar da "Qəbələ"nin keçmişdə buraxdıqları səhvləri təkrarlayır), "Qəbələ" layihələri. Bu proseslərin yarımçıq qalmaması, futbolumuzun inkişaf yolu tutması üçün yalnız bir şey lazımdır. Mart ayında doğru seçim etmək. Əgər seçim doğru edilərsə, yaxın 10 ildə həm klublarımızın, həm yığmamızın, həm də futbolçularımızın beynəlxalq arenada böyük uğurlar qazanması getdikcə artacaq və Azərbaycan futbolu dünya futbolunun aparıcı qüvvələrindən birinə çevrilməyə başlayacaq. İnanın, bu mümkündür.

İlkin Abbasov