"Araz-Naxçıvan" Azərbaycan Premyer Liqasının XXIV turunda öz meydanında "Zirə"yə 0:3 hesabı ilə məğlub olub.

Prosport.Az xəbər verir ki, muxtar respublika təmsilçisinin baş məşqçisi Azər Bağırov oyundan sonra keçirilən mətbuat konfransında jurnalistlərin suallarını cavablandırıb:

– "Zirə"ni təbrik edirəm. İlk hissədə istədiyimiz kimi mübarizə apardıq. 60-cı dəqiqədən sonra oyundan düşdük və uduzduq. Toparlanıb qarşıdakı oyunlara köklənmək və bu matçı unutmaq lazımdır.

– Matçın qırılma anı penalti qərarının dəyişdirilməsi oldu?
– Son dönəmlərdə əleyhimizə, lehimizə o qədər qərarlar görürük ki... Çoxu da əleyhimizə olur. Xətti necə çəkirlər... Ondan qabaq da qol epizodlarımız oldu. Qol vursaydıq, tam başqa cür olardı. Belə oyunları uduzanda təsir edir. Çünki ilk yarıda istədiyimizi edirdik.

– "Zirə" son 10 matçda qələbə qazanmamışdı, 9 oyundur ki, qol vura bilmirdi. Daha aqressiv olacaqları gözlənilirdi. Bunu nəzərə almışdınız?
– Əlbəttə. "Neftçi" ilə oyunlarını da izləmişdik. Hər 3 qol epizodunu da özümüz verdik. 2 qol da "rikoşet"dən sonra vuruldu. Qol epizodları yaratdıq. Səhvlərimizdən istifadə etdilər. "Zirə" bizim üçün böyük ölçüdə çətinlik yaratmadı. 60-cı dəqiqədən sonra demək olar ki, uşaqlar sındı.