"İqor Ponomoryovun bu gün doğum günüdür, onu təbrik edirəm. Əsas can-sağlığıdır. Bu gün hər cür nəticə ola bilərdi. "Sabah" yaxşı komandadır. Hansı rəqibə qarşı oynayacağımızı bilirdik. Onların keyfiyyətli oyunçuları var. Təşkilatlanmış kollektivdir, müəyyən oyun üslubuna sahibdirlər. Bizim üçün çətin idi, ilk yarıda hücum qurmağa tələsirdik. Fasilədən sonra dinamik futbol oldu, qarşılıqlı hücumlar şəraitində keçən oyun idi. Azarkeşlər üçün də maraqlı matç alındı. Qapılar qarşısında yetərincə qol epizodları yarandı. Futbolçular meydanın hər qarışı uğrunda canlarını, başlarını qoymağa hazır idi. Komandanın toparlanması məni sevindirir. Müdafiədə səhvlər etmədik. Hücumda potensialımız böyükdür. Sadəcə, müdafiədə kobud səhvlər olurdu. Ötən oyunda 2 müdafiəçimizin hədiyyəsindən sonra 2:2 olmuşdu. Bu gün həmin hədiyyələr olmadı. Komanda düzgün yoldadır. Artıq stabil heyətə yaxınıq. Stabil heyət olacaqsa, oyun və nəticə də olacaq. "Sabah"a gələcək oyunlarda uğurlar arzulayıram".

Prosport.Az xəbər verir ki, bu sözləri Premyer Liqanın XXIV turunun "Sabah"la oyunundan (2:0) sonra "Səbail"in baş məşqçisi Şahin Diniyev mətbuat konfransında deyib. O daha sonra jurnalistlərin suallarını cavablandırıb.

– Verilməyən penalti epizodunuz var idi. Təkrara baxdınız?
– İkitərəfli idi. Həm verə bilərdi, həm də verməyə bilərdi. Baş hakim belə qərar verdi və hörmətlə yanaşıram.

– Ağabala Ramazanovun durumu necədir?
– Fərdi şəkildə bərpa prosesi keçir. Amma peşəkar şəkildə yox. Özünü bərpa etdikdən sonra martda məşqlərə qayıda biləcək.