"Azarkeşlər üçün çox maraqlı oyun oldu. Həm bizim, həm də rəqibin yaxşı epizodları var idi. İlk və 2-ci hissənin əvvəlində daha yaxşı çıxış etdik. Qol vurduqdan sonra oyunumuzda problemlər yarandı. Rəqib təzyiq etməyə başladı və bir neçə qol epizodları oldu. "Turan Tovuz" qələbə də qazana bilərdi".

Prosport.Az xəbər verir ki, bu sözləri “Neftçi”nin baş məşqçisi Miodraq Bojoviç Premyer Liqanın XXIV turunun “Turan Tovuz”la görüşündən (1:1) sonra keçirilmiş mətbuat konfransında deyib. Monteneqrolu mütəxəssis daha sonra jurnalistlərin suallarını cavablandırıb:

– Əyalətdə ilk səfər matçınız idi. Təzyiqi nə dərəcədə hiss etdiniz?
– Azarkeşlər komandalarını çox gözəl dəstəkəyirdi, təbiət də gözəl idi.

– Rəqib son dəqiqələrdə sol cinahdan hücumlar qururdu. Bunun qarşısını almaq üçün niyə tədbir görmədiniz?
– İstədiyimiz bütün əvəzetmələri etmişdik. Dəyişiklik limitimiz dolmuşdu. 

– Mark Tamaşın oynamamasının səbəbi nə ilə bağlıdır?
– Onun oynadığı matçda "Sumqayıt"a uduzmuşqduq. Bundan sonra artıq dəyişiklik etdik. Amma məğlubiyyətin səbəbkarı o deyildi.

– Həmyerliniz Marko Yankoviç "Qarabağ"da öz oyunu ilə adından söz etdirir. Gələcəkdə onu komandanızda görmək istəyərsiniz?
– Azərbaycanda hər məşqçi elə oyunçunu komandasında görmək istəyər.

– "Neftçi" bu heyətlə hansı nəticəni göstərə bilər?
– Qarşımıza 2-ci yeri tutmaq hədəfi qoyulub. Hər şey istədiyimiz kimi getsə, bu heyətlə hədəfə çata bilərik.

– Komandanın oyunundan razısınız?
– Heç vaxt komandamın oyunundan razı olmuram. Düşünürəm ki, daha yaxşısını göstərə bilərik.