Almaniyanın "Bayer" klubu bir mövsüm ərzində Azərbaycana 2-ci dəfə rəsmi səfər edəcək 3-cü klubdur.

Prosport.Az-ın xəbərinə görə, daha əvvəl İngiltərənin "Arsenal" və Kiprin APOEL klubları bir mövsüm ərzində paytaxtımıza 2 dəfə təşrif buyurub.

2018/19 mövsümündə "Qarabağ"la UEFA Avropa Liqasının qrup mərhələsində qarşılaşan və 3:0 qalib gələn "Arsenal" həmin mövsümün sonunda turnirin finalı üçün Bakıya gəlib. Həmin vaxt Bakının ev sahibliyi ilə keçirilən final matçında "Arsenal" əzəli rəqibi "Çelsi"yə 1:4 hesabı ilə uduzaraq Bakını bu dəfə məyus tərk etmişdi.

2019/20 mövsümündə isə Kipr çempionu APOEL UEFA Çempionlar Liqasının III təsnifat mərhələsində 1 həftə əvvəl 1:2 uduzduğu "Qarabağ"a Bakıda 2:0 qalib gəlmiş və komandamızı turnirdən kənarlaşdırmışdı. Daha sonra həmin mövsüm tərəflərin yolu Avropa Liqasının qrup mərhələsində kəsişmişdi. 2019-cu ilin oktyabrın 24-də keçirilmiş "Qarabağ"la APOEL arasında Bakıda keçirilmiş matçda 2:2 hesabı qeydə alınmışdı. Sonda qrupu APOEL 2-ci, "Qarabağ" 3-cü yerdə başa vurmuşdu.

"Qarabağ"ın Avropa Liqasının 1/8 finalındakı rəqibi olan "Bayer" isə cari mövsüm eyni turnirin qrup mərhələsində artıq "köhlən atlar"la qarşılaşıb. Noyabrın 9-da Bakıda keçirilmiş matçda "Bayer" yalnız 90+4-cü dəqiqədə vurduğu penalti qolu ilə qalib gəlməyi bacarıb.

Onu da bildirək ki, ötən il Türkiyənin "Beşiktaş" klubu 2 dəfə Bakıda olub. Lakin bunun biri özəl xeyriyyə matçı olub. Əvvəlcə mayda "Sabah"la Bakıda yoxlama matçına (3:3) çıxan "qara qartallar" daha sonra avqustda "Neftçi" ilə Avropa Konfrans Liqasının III təsnifat mərhələsi üçün Bakıya gəlməli olmuşdu. "Beşiktaş" hər 2 matçda qalib gələrək (3:1, 2:1) mərhələ adlayan komanda olmuşdu.

Qeyd edək ki, "Qarabağ" Almaniya çempionatının məğlubedilməz lideri "Bayer"lə növbəti dəfə martın 7-də Bakıda, martın 14-də isə Leverkuzen şəhərində qarşılaşacaq. Cütün qalibi 1/4 finala çıxacaq.