UEFA Avropa Liqasında mübarizəni davam etdirən komandaların məğlubiyyətsiz oyunlar seriyasına görə reytinqi açıqlanıb.

Prosport.Az xəbər verir ki, qitə futbol qurumun tərtib etdiyi siyahı klubların daxili çempionatda və Avropa Liqasında ümumilikdə keçirdiyi son 5 matçın nəticələrinə əsasən hazırlanıb.

“10-luq”da Azərbaycan təmsilçisi "Qarabağ" da yer alıb. Son 5 qarşılaşmanın 4-də qələbə qazanıb, 1-də heç-heçə edən Ağdam təmsilçisi Portuqaliyanın “Benfika”, Çexiyanın “Slaviya” (Praqa) və Almaniyanın “Bayer” klubları ilə birlikdə 5-8-ci yerləri bölüşdürür.

Reytinqə maksimum nəticə ilə Portuqaliyanın “Sportinq”, İtaliyanın “Atalanta”, Şotlandiyanın “Reyncers” və Türkiyənin “Qalatasaray” komandaları başçılıq edir. Son 2 pillədə isə İngiltərədən “Liverpul” və Çexiyadan “Sparta” (hər ikisi 4 qələbə, 1 məğlubiyyət) qərarlaşıb.

Qeyd edək ki, “Qarabağ” sabah Avropa Liqasının pley-off mərhələsinin cavab oyununda Portuqaliyanın “Braqa” klubunu qəbul edəcək. Tofiq Bəhramov adına Respublika Stadionunda keçiriləcək görüş saat 21:45-də başlayacaq.