"Oyun kifayət qədər çətin keçdi. "Zirə" strukturlu və komanda şəkildə oynayır. Bilirdik ki, onlar az qol buraxan və az qol vuran komandadır. Rza Cəfərov iki epizodda bizi qoldan xilas etdi. Bu baxımdan bəxtimiz gətirdi. Ondan sonra oyun nisbətən daha bərabər keçdi. Bir qol vurduq, ikinci yarıda da epizodlarımız var idi, vursaydıq, oyun daha rahat alınardı. Matç son ana qədər gərgin keçdi və biz hakimin final fitini gözləyirdik".
Prosport.Az xəbər verir ki, bu sözləri "Neftçi"nin baş məşqçisi Miodraq Bojoviç Premyer Liqanın XXIII turunun "Zirə" ilə oyunundan (1:0) sonra mətbuat konfransında deyib.
O, daha sonra jurnalistlərin suallarını cavablandırıb:
- İlk mətbuat konfransınızda bildirmişdiniz ki, komandanın yaxşı nəticələr göstərməsi üçün altı həftə lazımdır. Altı həftə keçib, amma müdafiədə səhvlər, hücumda problemlər davam edir. Bu problemlərin həll olunması üçün nə qədər vaxt lazımdır?
- Çox yaxşı qeyd etdiniz. 28 gün ərzində 7 oyun keçirmişik. Hər dörd gündən bir oynayırıq. Biz bura gələndə zədəlilərin sayı kifayət qədər idi. Alfa Konte və Brayan Moreno üçüncü dövrənin başlamasına iki gün qalmış komandaya qoşuldular. Qara Qarayev və Filip Ozobiç oktyabr-noyabrdan oynamırdılar. Eyni zamanda, komandada yaş faktoru öz sözünü deyir. Bu baxımdan bərpa üçün daha çox vaxt lazımdır.
- "Neftçi"nin əvəzedici heyəti yaxşı oyun göstərir. Oradan kimlərisə əsas komandaya cəlb etmək fikriniz var?
- Oyunçularımız kifayət qədərdir. Amma əsas komandada zədəli futbolçularımız var. Bizə onlarla keyfiyyətli şəkildə işləmək lazımdır. Məşqlərə oyunçu lazım olanda əvəzedici heyətdən dəvət edirik.
- Sizin üçün prioritet nədir, nəticə, yoxsa yaxşı oyun?
- "Araz-Naxçıvan"a məğlubiyyətdən sonra komandada ab-havanın, əhval-ruhiyyənin və özgüvənin artması baxımından üç xal daha önəmli idi.
- "Zirə"nin ləğv olunan qolundan öncə qayda pozuntusu qeydə alındı. Rəqibin baş məşqçisi bildirdi ki, orada heç bir fouldan söhbət gedə bilməz. Həmin epizodla bağlı fikriniz necədir, həmkarınızla razısız?
- O, mənim həmkarımdır. Onun sözlərinə şərh verməyəcəm.
- Rəqib sizdən oyun planında üstün idi. Sizə elə gəlmir ki, "Zirə" hesabı ilk dəqiqələrdə açsaydı, oyunun taleyi başqa cür olacaqdı?
- Nəsə demək çətindir. Yəqin ki, daha çətin keçərdi. Bəxt də faktorlardan biridir. Bu, bilirsiniz nəyə oxşayır? Baba nənə olsaydı, necə olardı?
- Bu gün "Neftçi"nin bəxti gətirdi, "Zirə"nin bəxti gətirmədi?
- Hər ikisi oldu.
- Əsas rəqiblərinizdən olan "Qarabağ" bu həftə Avropa Liqasının pley-off mərhələsində "Braqa"nı məğlub etdi. Onların qələbəsini necə dəyərləndirirsiniz?
- Çox sevinirəm. Çünki "Qarabağ" Azərbaycanın klubudur. Avropadakı istənilən qələbə Azərbaycandakı futbolun səviyyəsini yüksəldir. Burada nə qədər işləsəm, avrokuboklarda oynayan bütün klublarınıza azarkeşlik edəcəm. Əlbəttə ki, "Qarabağ" - "Neftçi" oyunlarında özümüzə azarkeşlik edəcəm.