"Belə stadionda oynamaq xoş oldu. Çünki Sumqayıt şəhər olaraq haqq edirdi bu cür stadionu. Premyer Liqanın bütün klublarında bu cür stadionların olması, çempionatımıza rəng qatacaq. Qışdan sonra ən yaxşı komandaya qarşı oynayırdıq. "Sumqayıt" qış fasiləsindən sonra yaxşı start götürüb. "Neftçi"ni də məğlub etdilər. Bu gün qol olmasa da, meydanda hər saniyə mübarizə getdi. Taktiki savaş oldu. Futbolçularım yaxşı çıxış etdi. Hücumda bir az da soyuqqanlı olsaydıq... Ən yaxşı epizodlar bizdə oldu. Çemmpionatın önəmli dönəmindəyik. Rəqibi uzaqlaşmağa qoymadıq. Özümüz də həmin yerlərə qalxmağa çalışırıq".

Prosport.Az xəbər verir ki, bu sözləri "Turan Tovuz"un baş məşqçisi Ayxan Abbasov Premyer Liqanın XXIII turunun "Sumqayıt"la oyunundan (0:0) sonra keçirilmiş mətbuat konfransında bildirib.

Mütəxəssis yenilənmiş Mehdi Hüseynzadə adına Sumqayıt şəhər stadionunu misal çəkərək, bölgələrimizdə də müasir arenalara ehtiyac olduğunu bildirib:

"Futbolumuza yaxşı meydançalar lazımdır. Görünüş də önəmlidir. İnkişaf istəyiriksə, bunların hamısı şərtdir. Paltardəyişmə otağına girirsən, müasir, geniş, hər bir şərait var. Elə stadionlarımız var, futbolçular bir-birinə deyir ki, bir az o tərəfə çəkil, əynimizi rahat dəyişək. Bunların hamısı vacibdir. Ümid edirik ki, Tovuzda, Gəncədə, bölgələrdə belə stadionlar olacaq".