"Araz-Naxçıvan" Azərbaycan Premyer Liqasının XXIII turunda səfərdə "Səbail"lə 2:2 hesablı heç-heçə edib.

Prosport.Az xəbər verir ki, muxtar respublika təmsilçisinin baş məşqçisi Azər bağırov matçdan sonra keçirilən mətbuat konfransında jurnalistlərin suallarını cavablandırıb:

– Maraqlı oyun keçdi. Hərdən coşub hakimlərin üstünə qışqırırıq. Amma bir tərəfdən də dəstək olmaq lazımdır.

– Məhəmməd Kadirini fasilədə əvəzlədiniz. Bu nə ilə bağlı idi?
– Oyun planında mərkəzdə 2-3 dəfə gecikməsi oldu. Rəqib ondan topu almaq istəyirdi. 4 gün bundan əvvəl yaxşı oyun keçirib. İstədik ki, 2-ci hissədə sürəti artıraq. Onun yerinə Vandersonu oyuna buraxdıq. Mənə elə gəlir ki, pis dəyişiklik olmadı.

– 1 xala sevinirsiniz, yoxsa məyus olursunuz?
– Ümumi götürəndə səfərdə 1 xal pis deyil. Amma 2:1 öndə idik, hesabı qoruya bilərdik. Epizodlarımız oldu, fərqi artıra da bilərdik. Mənə elə gəlir ki, bu gün 2 xal itirdik.

– Orxan Əliyevin yüksələn performansını nə ilə əlaqələndirirsiniz? Kapitanlığı ona verməklə bağlı ola bilər?
– Yerlilərə daha çox təkan vermək lazımdır ki, özlərinə gəlsin. 3-4 gündən bir oyunlar futbolçulara fiziki cəhətdən pis təsir edir. Heyətimiz elə də geniş deyil ki, böyük dəyişikliklər edək.

– "Səbail"i mövsüm ərzində məğlub edə bilməmisiniz. Bunu necə şərh edərdiniz?
– İlk oyunda hakim səhvi var idi. 45-ci dəqiqədə qapımıza penalti verdi. Bu gün deməzdim ki, ciddi hakim səhvləri oldu. Amma elə şeylər var ki, referilər öz üzərlərində işləməlidir. 4-cü hakim nəsə deyir, baş hakim razılaşmır, öz bildiyini edir. "Səbail"lə 3 oyunun hamısında yaxşı oynamışıq. Yerli futbolçuların ustalıq tərəfini inkişaf etdirməliyik. Legionerlərimiz pis deyil. Bəxtsizliklə əlaqələndirmək olar.