"Qarabağ"ın 15 yaşadək komandasının üzvü Əli Bəşirov 10 nömrə kimi gələcək vəd edən futbolçularımızdandır. U-15 millimizə də çağırılır. Ötən il avqustun 27-də UEFA İnkişaf turnirində Estoniyanın qapısına 90+2-ci dəqiqədə qol vuraraq komandamıza 1:0 hesablı qələbə də qazandırıb. Belarusda keçirilən "Bizim gələcəyimiz" adlı turnirdə Rusiyanın "Zvezda" komandası ilə matçda da "Qarabağ"ın ilk qoluna imza atdı. Onun cərimə zərbəsindən birbaşa qapıya vurduğu qolu turnirin ən yaxşı qolu kimi də adlandırmaq olar. Düzdür, təşkilatçılar tərəfindən belə bir fərdi nominasiya nəzərdə tutulmasa da, oyunu, gözəl çarpaz ötürmələri ilə təşkilatçıların diqqətini çəkməyi bacardı və turnirin ən yaxşı yarımmüdafiəçisi adına layiq görüldü.

Prosport.Az hələ 13 yaşın içərisində olan pleymeykerdən müsahibə götürüb.

– Çempionatın ən yaxşı yarımmüdafiəçisi seçildiyiniz üçün təbrik edirəm. Turnir haqda fikirlərinizi bilək...
– Təbrikə görə təşəkkür edirəm. Klub rəhbərliyinə belə bir turnirə bizi göndərdiklərinə görə minnətdarlığımı bildirirəm. Ailəmə isə ayrıca təşəkkür edirəm ki, oyunlara turnirin "Yutub" kanalı vasitəsilə baxıb məni dəstəkləyirdilər. Bu turnir gözəl təşkil olunmuşdu, bizim üçün də gözəl təcrübə idi. Düzdür, bizim proqnozumuzda finala çıxıb çempion olmaq vardı. Amma qismət 5-ci yer imiş.

– Türkiyədəki "Kartepe Cup"da da qalib gəlmişdiniz. Hansı turnir daha səviyyəli idi?
– Bu turnir. Burada daha səviyyəli və güclü komandalar vardı. Minsk "Dinamo"su və qalib gəldiyimiz "Baltika" komandalarının adları çox şeyi deyir.

– 1/4 finalda rəqibə qol vura bilmədiniz və nəticədə penaltilərdə uduzdunuz. O oyunda nə çatmadı?
– Bir az arxayınçılığımız da vardı. Bu bizim üçün bir dərs oldu. Oyunu yaxşı keçirmişdik, hücumlar da yaxşı etdik. Sadəcə, rəqib müdafiədən oynayırdı. Oyunumuza baxıb analiz etmişdilər, xüsusi oyunçularımızı bağlamışdılar. Qırmızı vərəqə də aldılar, 10 nəfərlə tamamilə müdafiəyə çəkildilər. Onların istəyi də oyunu penaltilərə aparmaq idi. Bu da onlarda alındı.

– İndi yenidən Azərbaycan çempionatında oynayacaqsınız. Orada rəqiblərinizi böyük hesablarla məğlub edirsiniz. Rəqabətin olmasını yəqin siz də istərdiniz...
– Bizim üçün də çempionat bir az maraqsız keçir. Bu turnirdəki kimi oyunlar orada olmur. İstərdik ki, çempionatda "Sabah", "Neftçi" kimi komandalar çox olsun.

– Karyeranız ərzində belə bir mükafat qazanmışdınız?
– Bəli. "Qarabağ"la "Sabahın ulduzları" yarışında iştirak edərkən turnirin ən yaxşı oyunçusu seçilmişdim. Onda 10 yaşım vardı. Amma bu, beynəlxalq səviyyədə yarışdan aldığım mükafat olduğundan, təbii ki, bu daha dəyərlidir.

– Futbola gəlişiniz necə olub? "Qarabağ"a hansı komandadan keçmisiniz?
– Yarım il "Dortmund Bakı" komandasında məşq keçmişəm. Daha sonra "Qarabağ" komandasında baxışda oldum və bəyənildim. 2009-cu il təvəllüdlü futbolçularla 3 il oynadım. Hətta 1 il 2008-ci il təvəllüdlülərlə də oynamışam. Daha sonra yenidən 2009-lara qayıtdım və Azərbaycan çempionu oldum. Hazırda U-15 milli komandamızın da üzvüyəm.

– "Qarabağ"ın U-15 komandasında 3 2010 təvəllüdlü futbolçu var. Bunlar qapıçı Bilal Hacıyev, kapitanınız Uğur Qurbanlı və sizsiniz. Özünüzdən 1 yaş böyüklərlə oynamaq çətinlik yaratmır?
– Xeyr, heç bir çətinliyi yoxdur. Dediyim kimi, əvvəl 2008-ci illərlə də oynamışam. Ona görə də heç bir çətinlik yoxdur.

Səbuhi Musa