"Qarabağ" Futbol Akademiyasının rəhbərliyi Minsk "Dinamo"sunun Akademiyasını ziyarət edib.

Prosport.Az-ın Minskə ezam olunmuş əməkdaşının verdiyi xəbərə görə, 2018-ci ildən "Dinamo" Akademiyasının direktoru olan Sergey Pavlyuçuk Azərbaycandan gəlmiş həmkarı – "Qarabağ" Akademiyasının koordinatoru Aftandil Hacıyev və akademiya meneceri Murat Karamanı oradakı şəraitlə tanış edib.

3 il əvvəl tikilən bazada qonaqları maraqlandıran suallara aydınlıq gətirilib. Bildirilib ki, son 5 ildə "Dinamo" Akademiyasından çıxan futbolçulardan 58-i hazırda başqa Belarus klublarında çıxış edir. Həmçinin, məlum olub ki, hazırda "Dinamo" Akademiyasında 2008-ci il təvəllüdlü Nurxan Qasımov adlı atası azərbaycanlı olan futbolçu çıxış edir.

Qeyd edək ki, "Qarabağ" Futbol Klubu son illər Akademiya üçün baza tikməyi planlaşdırır.