"Belə turnirlərin olması bizim üçün, uşaqların inkişafı üçün çox vacibdir. Bizə tanış olmayan rəqiblə oynadıq. Öz çempionatımızda olduğu kimi, oyun planında ciddi dəyişiklik etmədik. Öz oyun sistemimizlə oynadıq və sevindirici haldır ki, qələbə qazandıq. Sabah daha 2 oyunumuz var. Çalışacağıq ki, yaxşı oyun göstərək". 

Bunu Prosport.Az-ın Belarusun paytaxtı Minskə ezam olunmuş əməkdaşına açıqlamasında "Qarabağ"ın 15 yaşadək komandasının baş məşqçisi Vüqar Əsgərli deyib.

"Qarabağ" bu gün "Bizim gələcəyimiz" adlı turnirdə Rusiyanın "Zvezda" komandasını 2:0 məğlub edib. Vüqar Əsgərli Əli Bəşirovun cərimə zərbəsindən vurduğu mükəmməl qolu, qapıçı Bilal Hacıyevin dəf etdiyi penaltini və Murad İbrahimlinin fərqləndiyi epizodu şərh edib:

"İlk qol həqiqətən möhtəşəm alındı. Buna daha çox fərdi keyfiyyət deyərdim. Qapıçının penalti qaytarmağı komandanı daha inamlı etdi. Bu həm də qapıçının gələcək karyerası üçün də önəmli idi. 2-ci qol isə ev tapşırığı idi. Bunun üzərində işləmişdik. Sevindirici hal odur ki, onu uşaqlar meydançada həyata keçirə bildilər".

Qeyd edək ki, "Qarabağ" sabah Bakı vaxtı ilə 11:35-də Rusiyanın "Olimpik" komandası ilə qarşılaşacaq. Bakı vaxtı ilə saat 14:40-da isə BATE ilə "Qarabağ"ı çətin oyun gözləyir.