Çox zaman aşağı yaş qruplarından çıxan, formalaşan futbolçular sonradan tanınmışa çevrilir. Lakin futbolçu məşhurlaşsa da, onun formalaşmasında böyük əziyyəti dəymiş məşqçilər unudulur.
Bu səbəbdən də Prosport.Az olaraq yeni layihəyə başlamaq qərarına gəldik. Bu layihədə uşaq məşqçilərini tanıtmaqla məşğul olacağıq.
İlk olaraq "Qarabağ"ın 15 yaşadək komandasını çalışdıran Rakif Əliyevdən başladıq. Bu da səbəbsiz deyil. Çünki hazırda "Qarabağ"ın məhz U-15 komandası bu klubun digər aşağı yaş qrup komandalarından fərqli olaraq, AFFA-nın keçirdiyi çempionatda 1-ci yerdə gedir.
Qısası, başlayaq və Rakif Əliyevi öz dilindən tanıyaq:
"1983-cü ildə Ağdaşda anadan olmuşam. 1990-1994-cü illərdə Mingəçevirdə yaşamışam. Elə futbola da orada sabiq futbol hakimi Rövşən Əhmədovun rəhbərliyi altında başlamışam. 1994-cü ildən Bakıya köçmüşük. Burada Canbaxış müəllimin, daha sonra da Emil İsgəndərovun rəhbərliyi altında futbolun sirlərinə yiyələnmişəm. 2000-ci ilədək uşaq futbolunda oynamışam.
17 yaşımda – 2000-ci ildə "Ədliyyə"də I divizionda çıxış etməyə başlamışam. 2002/03 mövsümündə I divizionda "Azərsun" komandasında çıxış etmişəm. Şirkət "Qarabağ"a sponsorluq edəndən, biz o komandaya düşə bilmədk və kənarda qaldıq. Çünki onda cəmi 20 yaşım vardı. Daha sonra Beyləqanda hərbi xidmətdə olarkən "Qara bəbir"də oynadım. 2005/06 mövsümündə Neftçalanın "ANŞAD-Petrol" komandasında çıxış etmişəm. 2006/07 mövsümündə "Qaradağ Lökbatan"da, 2007-dən "Bakılı"da oynamşam. I diviziondan elitaya qalxmışıq.
Komanda elitadan düşəndə də "Bakılı"da qaldım. 2014/15 mövsümündə orada oynayan məşqçi oldum, həm də kapitan idim. 2015-ci ildə "Qəbələ"nin Akademiyasına məşqçi işi üçün CV göndərdim. İndi "Feyenoord"un koordinatoru işləyən Stenli Brard mənim məşqçilik biliyimi lövhədə yoxladı və məşqçi kimi işə götürdü. 3 il orada işlədim.
2019-cu ildə isə Kazbek Tuayevin o vaxt direktoru olduğu İxtisaslaşdırılmış Uşaq-Gənclər Olimpiya Ehtiyatları Futbol Məktəbində işə düzəldim. 2021-ci ilədək orada U-10 komandası ilə işlədim. Ələkbər Məmmədovun adına keçirilən 8 komandanın iştirak etdiyi turnirdə çempion olduq. Bu səbəbdən 3 ayın tamamında orda rəsmi işə götürüldüm.
2021-ci ildə "Qarabağ" Akademiyasının sabiq koordinatoru Tacəddin Doğan "Qəbələ" Akademiyasında işləyən Halim Fıçıcının rekomendasiyası əsasında məni işə çağırdı. İlk il "Qarabağ"ın U-17-si ilə 4-cü olduq. Ötən mövsüm U-14 komandasını çalışdırdım. Bu komandanı çempion etdiyimdən, indi U-15 olan bu komandada məni saxladılar".