"Araz Naxçıvan"ın müdafiəçisi Ege Atlam Adnanın Prosport.Az-a müsahibəsi:

– Mövsümü I divizionda çempion başa vuracağınızı gözləyirdiniz?
– Çox səviyyəli futbolçularımız var. Ona görə də çempionluq gözləyirdim. Çox şükür ki, Allah bunu bizə qismət etdi. Ümid edirəm ki, növbəti mövsüm daha da yaxşı çıxış edəcəyik.

– Son turun “Zaqatala” ilə oyunun ilk hissəsində gərgin mübarizə görmədik. Yalnız ikinci hissədə 2 qol vurub, qələbəni təmin etdiniz. Bu çempionluğu öncədən təmin etdiyinizdən, motivasiyanın olmaması ilə bağlı idi?
– Motivasiya ilə əlaqəli deyil. Mövsümün sonudur. Belə düşüşlər olur, normaldır. Yorğunluq öz sözünü deyir. Bununla belə, əlimizdən gələni etdik və qalib gəlməyi bacardıq.

– Müqaviləniz başa çatdı. Klub rəhbərliyi sizə yeni sözləşmə imzalamaqla bağlı bir söz deyib?
– Rəhbərliklə görüşüm olmayıb. Amma hər halda görüş olacaq. Bunu zaman göstərəcək. Təbii ki, Azərbaycan Premyer Liqasında oynamaq istəyirəm.

– I divizionda sizdən başqa, türkiyəli oyunçu yoxdur. “Araz Naxçıvan”a gəlişiniz necə baş tutdu?
– Azərbaycanın U-16, U-17, U-21 millilərində oynamışam. Ona görə də 2 pasportum var. Burada məni tanıyırlar. Menecer vasitəsilə bura keçdim.

– Bir az da aydınlaşdıraq. Premyer Liqada imkan olmadı ki, I divizionda oynamağa məcbur oldunuz?
– Türkiyədə zədə almışdım. Bir yerdən başlamağım lazım idi. Bu səbəbdən Premyer Liqaya deyil, I diviziona gəldim. "Araz Naxçıvan"a keçdiyim üçün peşman olmadım.

Səbuhi Musa 
Naxçıvan