Qadın voleybolçulardan ibarət millimizin yeni baş məşqçisi Ataman Güneyligilin Prosport.Az saytına müsahibəsi

– Sizin təqdimatınızın keçirildiyi mətbuat konfransı zamanı ad çəkmədiniz. Sizə millimizdə çalışmaq təklifi kimi tərəfindən gəldi?
– Təklif federasiya prezidenti Şahin Bağırovun vasitəsilə Bəhruz (federasiyanın vitse-prezidenti Bəhruz Quliyev) və Elqar bəydən (İdarə Heyətinin üzvü Elqar Bağırov) gəldi. Danışıqlar çox tez baş tutdu və 10 günə hər şeyi razılaşdırdıq.

– Əslində bu kimi suallardan məşqçilər xoşlanmır. Bura gəlməzdən əvvəl "Qalatasaray"da baş məşqçi işləmisiniz. Oradakı maaşla Azərbaycandakı maaş arasında fərq nə qədərdir?
– Bu sualdan həqiqətən xoşum gəlmir (gülür). Ciddi fərq yoxdur. Demək olar ki, eynidir. Azərbaycandakı müqaviləm 3 illikdir. Amma "Qalatasaray"da 12 il işləmişəm. Növbəti mövsüm üçün də müqaviləm qalırdı, ancaq özüm qalmaq istəmədim. 

– Azərbaycan macərasından sonra digər klubda fəaliyyətinizi davam etdirəcəksiniz. O hansı klubdur?
– Yeni mövsüm üçün Yunanıstanın PAOK klubu ilə anlaşmışam. Avqustun sonunadək Azərbaycan millisində çalışacağam, ondan sonra Yunanıstanda fəaliyyətimə başlayacağam.

– 3 aylıq fəaliyyətiniz müddətində ailənizi də bura gətirəcəksiniz?
– Yox. Ailəm burada olmayacaq, İstanbulda qalacaq. Özüm Bakıda olacağam. Avropa çempionatınadək komanda ilə ölkə xaricində təlim-məşq toplanışında da olacağıq.

– Avropa çempionatı üçün yeni legionerlərin komandaya cəlb olunması nəzərdə tutulubmu?
– Onu indi deməyim. Amma ola bilər. 1 həftə içində bəlli olacaq. Öncə onlar ikinci komandaya qoşulacaqlar. Orada bəyəndiyimiz oyunçuları əsas milliyə çağıracağıq (bizdə olan məlumata görə, həmin oyunçular Rusiyadandır – S.M.). 

– 3 ay müddətində komandanı Avropa çempionatına hazır duruma gətirmək mümkün olacaqmı?
– Mümkündür. Bizdə çox yaxşı oyunçular var və komanda qrup mərhələsindən çıxa biləcək potensialdadır. Millidə həqiqətən yaxşı oyunçular var. Rumıniya, Türkiyədə tanıdığım səviyyəli oyunçular çıxış edir.

Səbuhi Musa