Bu gün Dünya Qadın Seriyasının Astara mərhələsində qadın 3x3 basketbolu üzrə qrup oyunları start götürüb.

Prosport.Az-a verilən xəbərə görə, turnirin açılış oyununda gənclər və idman naziri Fərid Qayıbov və elm və təhsil naziri Emin Əmrullayev iştirak ediblər.

Açılış oyunu A qrupu çərçivəsində Almaniya və Ukrayna milliləri arasında baş tutub. Bu görüşdə Ukrayna kollektivi 15:14 hesablı qələbə qazanıb. Qrupun digər matçlarında Misir Almaniyaya 16:15 və Ukrayna Misirə 20:12 qalib gəlib.

B qrupunda isə favorit Çin millisi Avstriya komandasına 13:14 hesabı ilə məğlub olub. Çin və Avstriya Çexiyanı müvafiq olaraq 21:10 və 21:9 məğlub edib. 

C qrupunda qadın milli komandamız Polşa və Çinin "Yuanda" komandalarına müvafiq olaraq 7:22 və 9:21 hesabı ilə uduzub və mübarizəni dayandırıb. "Yuanda" həmçinin Polşaya 18:6 qalib gələrək qrupu lider kimi başa vurub.

D qrupunda qərarlaşan "Neftçi" klubu Rumıniyaya 15:12 və Macarıstana 17:15 qalib gələrək 1/4 finala vəsiqə qazanıb. Qrupun digər görüşündə Macarıstan Rumıniyaya 19:18 hesabı ilə qalib gələrək qrup 2-cisi olub.

1/4 finalda "Neftçi" nin rəqibi Çin millisi olacaq. Oyun sabah saat 14:30 -da start götürəcək və "CBC Sport" telekanalında canlı yayımlanacaq. 1/4 finalın digər oyunları Ukrayna – Polşa, Avstriya – Macarıstan, "Yuanda" – Misir matçları olacaq.