Azərbaycan İdman Jurnalistləri Assosiasiyasının (AİJA), “Qalatasaray” İdman Klubunun və Azərbaycan Minifutbol Federasiyasının (AMF) təşkilatçılığı, Azfar Group-un baş sponsorluğu və Beynəlxalq Futvole Federasiyasının dəstəyi ilə “Qalatasaray”ın UEFA kubokunu qazandığı gündən düz 23 il sonra İstanbulda – Florya Mətin Oktay bazasında Heydər Əliyevin 100 illiyi şərəfinə qardaşlıq görüşü keçirilib. 

Prosport.Az xəbər verir ki, matçda “Qalatasaray”ın əfsanələri ilə Azərbaycan idman jurnalistlərinin milli komandası üz-üzə gəlib. 

AİJA-nın vitse-prezidenti və sports.az saytının baş redaktoru Anar Şabanoğlunun ideyası ilə keçirilən qardaşlıq matçı "Qalatasaray"ın prezidenti Dursun Özbək və Azərbaycanın İstanbuldakı konsulu Nərminə Mustafayevanın rəmzi vuruşları ilə başlayıb. Komandalar meydana Heydər Əliyevin “1 millət, 2 dövlət” sözləri yazılmış bannerlə çıxıb. 

Qardaşlıq görüşü 3:3 hesabı ilə bitib. Komandamızın qollarına 2 dəfə fərqlənən Gündüz Abbaszadə və Emin Abbasov imza atıblar. “Qalatasaray” əfsanələrinin heyətində İlyas Kahraman 2, Evren Turhan 1 ola imza atıb.

AİJA prezidenti Eldar İsmayılov, AMF prrzidenti Taleh Nəsibov, tanınmış idman jurnalisti Elçin Cəfərov və Anar Şabanoğlu “Qalatasaray” prezidenti Dursun Özbək, klubun İdarə Heyətinin azərbaycanlı üzvü Emin İmanov və komandanın baş məşqçisi Okan Buruka xatirə hədiyyələrini təqdim ediblər.

Dursun Özbək, Eldar İsmayılov və Nərminə Mustafayeva Heydər Əliyevin Azərbaycan-Türkiyə qardaşlığının möhkəmlənməsində xidmətlərindən danışıblar, bu münasibətlərin əbədi və sarsılmaz olduğunu vurğulayıblar.

Oyundan sonra “Qalatasaray” İdman Klubu tərəfindən ziyafət təşkil edilib.