Mayın 5-də FIFA Hakimlər Komitəsinin sədri, sabiq futbol hakimi Pyerluici Kollina Bakıda səfərdə idi.

O, Bakı Olimpiya Stadionunda AFFA-nın baş katibi və azərbaycanlı hakimlərlə qısa müddətli görüş keçirmişdi. Lakin AFFA-dan onun səfərinin onlar tərəfindən təşkil edilmədiyi bildirilmişdi.

Prosport.Az məsələni araşdıraraq əfsanəvi italyan hakimi bura dəvət edən şirkətin adını müəyyənləşdirib. Bu, "PAŞA Holdinq"dir. Qurumun Korporativ Kommunikasiyalar üzrə baş mütəxəssisi Aytac Muxtarzadə bu informasiyanı saytımıza təsdiqləyib:

"Bəli, Kollina bizim holdinq tərəfindən Azərbaycana dəvət olunmuşdu. Dəvətin əsas məqsədi PAŞA Hub əməkdaşlıq və inkişaf mərkəzi tərəfindən təşkil olunan Leading Lights proqramı çərçivəsində PAŞA Qrupun rəhbər vəzifədə çalışan əməkdaşları üçün liderlik sessiyası keçirmək idi. Qeyd edim ki, həmin Mərkəzin Leading Lights inkişaf proqramı çərçivəsində Kollina kimi liderlik üzrə ekspertlər bura dəvət olunur.

Mid Management (orta idarəçilər) əməkdaşlarımız onun seminarında iştirak etdilər. Bildiyiniz kimi, futbol kollektiv idman növüdür. Kollina seminar iştirakçılarına kollektivlə işləmək bacarıqları və liderlik keyfiyyətlərinin biznesə tətbiqi ilə bağlı təcrübəsini bölüşdü. Leading Lights proqramının iştirakçıları və mentorları cənab Kollina ilə qərarların verilməsi, dürüstlüyün davam etdirilməsi, inam və hörmətin qazanılması, iddialılıq və diplomatiyanın balanslaşdırılması mövzusunda müzakirələr aparmaq şansı əldə etdilər".

Səbuhi Musa