Bu yaxınlarda Azərbaycan Televiziyasının efirində 1970-ci ildə "Neftçi" barədə çəkilən bir reportaj gözümə dəydi. Reportajda deyilir ki, bu "Neftçi"ni izləyəndə adam düşünür ki, elə bil 4 il əvvəl SSRİ çempionatında bürünc medal qazanan bunlar deyilmiş. Qayıdaq müasir dövrə. Bir neçə gün əvvəl "Sumqayıt"la oyuna baxanda biz də elə eks həmkarlarımız kimi düşündük... Görəsən, tarixi uğurlarla bizi sevindirən "Neftçi" deyildimi?
Əvvala, məsələnin ən acınacaqlı tərəfindən danışım. Çempionatda “Sabah”la maçtdan əvvəl "Neftçi"nin sosial media hesablarında paylaşılan “Sabah olmayacaq” paylaşımı və ona verilən cavab klub azarkeşlərini o qədər məyus etdi ki, düşündük yəqin bir daha işçilər belə səhv etməz. Zarafat deyil, 86 yaşlı klubu belə biabır edən olmamışdı. Amma nə biləydik ki, bu hələ başlanğıcdır. Hələ onları daha böyük utanclar gözləyir. Əslində heç bir azarkeş öz klubunu sevdiyinə görə utanmamalıdır. Bu istənilən kluba və onun azarkeşinə aiddir. Klub rəhbərliyi də buna uyğun davranmalı, azarkeşinin başını aşağı etməməlidir. Amma, di gəl ki, bir neçə gün əvvəl bəlkə Azərbaycan tarixində ilk dəfə bir klubun azarkeşləri utandıqlarından bilmədilər hara girsinlər...
İçi mən qarışıq, elə hər kəs “Sumqayıt”ın instaqram ünvanından paylaşdığı cavabı izləyib, səssiz-səmirsiz qalmışdı... Həmişə aktiv sosial media işləri, Azərbaycanda ilk dəfə klub TV-nin əməkdaşları kimi fəxr etdiyimiz bu gənclər, paylaşdıqları videonun cavabını izləyib bəlkə özləri də gülürdülər. Vallah arada düşünürəm ki, sanki "Neftçi" TV-yə xüsusilə klubun imicinə zərbə vurmaq məqsədilə digər klublar tərəfindən adam yerləşdirilib. Nə bilim vallah, bəlkə də mətbuat işləri nümayəndəsi məhz onun üçün gətirilib? Hər halda, bunu çox adam düşünür.
Bir vaxt "Neftçi"nin rəsmi feysbuk səhifəsində şərh yazmışdım ki, bəs "Neftçi"də yolunda gedən tək şey TV-sidir. Amma artıq o da pozuldu. Təkrarçılıq olsa da, bildirim ki, bir klub ki öz azarkeşinin başını digərlərinin yanında aşağı edir, o klubdan nə azarkeşinə, nə də özünə xeyir gələr. Başı aşağı olmaq deyəndə, təkcə klubun uduzmasını nəzərdə tutmuram. Komanda uduzar da, udar da. Məsələ filmdə deyildiyi kimi, "vnimatelnı" olmaqdadır. Biz "Neftçi"nin uduzmasına da alışmışıq, amma biabır olmasına alışmamışıq.
Sonda onu da bildirim ki, "Neftçi" 2012-ci ildə Avropa Liqasının qrup mərhələsinə vəsiqə qazananda klubun sosial şəbəkə hesablarında yalnız bir paylaşım diqqət çəkirdi: "Şanlı tarixin üçün savaş, "Neftçi". Məncə, klub rəhbərliyi, işçilər və futbolçular bu paylaşıma yenidən nəzər salsınlar.
Yazı və video Səbuhi Sadiq əməyinin məhsuludur