"Azərbaycan çempionatı noyabrda başlayacaq. Artıq ilk məşqimiz olub. Bu həftə də 2 məşq keçəcəyik. 3-cü gün köhnə "Şəfa"da və 5-ci gün Elmlər Akademiyasındakı minifutbol meydançasında məşqimiz olacaq".

Bunu Prosport.Az-a millimizin sabiq futbolçusu, hazırda "Araz-Naxçıvan" komandasında Azər Bağırovun köməkçilərindən biri işləyən Əfran İsmayılov deyib.

O yeni yaratdığı minifutbol komandasından danışıb. O bildirib ki, çempionatda yüksək yer tutmaq əsas hədəflərindən biridir: "Aşağı-yuxarı heyətimiz bəllidir. Minifutbol Federasiyasının rəhbərliyi, eləcə də məşqçi kimi çalışdığım "Araz-Naxçıvan" klubunun rəhbərliyi bu məsələdə bizə hər cür dəstəyi göstərir. İnşallah, ən yaxşısını edəcəyik ki, yüksək yerlərdən birini tutaq. Göstərməliyik ki, biz böyük futboldan ayrılsaq da, hələ də formadayıq".

Bu komandada "Araz-Naxçıvan"da məşqçilik karyerası quran Əfran İsmayılovdan başqa, Rail Məlikov və Ruslan Əmircanov, eləcə də karyerasını yenicə başa vurmuş Ruslan Abışov da yer alacaq. Beləliklə, ilkin heyətə görə, yeni yaradılan komandada Əfran İsmayılov, Rahid Əmirquliyev, Ruslan Abışov, Rauf Əliyev, Cavid Hüseynov, Elvin Məmmədov, Rail Məlikov, Kamran Ağayev, Ruslan Əmircanov, Rəşad Sadiqov, Vaqif Cavadov, İlqar Qurbanov, Mahir Şükürov, Cavid İmamverdiyev və Elhad Nəziri yer alacaq. Lakin son 2 futbolçunun çıxışı hələ tam dəqiqləşməyib. Onların iştirakı baş tutmasa, yeni veteran futbolçularla əvəzlənəcəklər. Komandanın baş məşqçisi isə futzal millimizin üzvü Xətai Bağırov olacaq.

Əfran İsmayılov komandanın adının "Qarabağ" ola biləcəyini də istisna etməyib: “Qarabağ” klubunun rəhbərliyi ilə danışıqlar gedir, alınsa, o adla iştirak edəcəyik. Olmasa, digər variantları nəzərdən keçirəcəyik”.

Səbuhi Musa