"Futbolçularımı təbrik edirəm. Yaxşı oyunla 3 xal qazandıq. Sonadək oynadıq. İsveçə gəlmiş azarkeşlərimizə təşəkkür edirəm. Xeyli sayda azarkeş gəlmişdi".

Prosport.Az-ın İsveçə ezam olunmuş əməkdaşının verdiyi xəbərə görə, bunu "Qarabağ"ın baş məşqçisi Qurban Qurbanov deyib.

O, UEFA Avropa Liqasının "Hekken"ə 1:0 qalib gəldikləri matçdan sonra keçirilən mətbuat konfransında sualları cavablandırıb: "Rəqibin topla yaxşı davranan, sürəli futbolçuları vardı. Bəzən onları qaçırdıq. Biz həddindən artıq diqqətli olmalıyıq. Amma ümmilikdə komandamdan razı qaldım".

Q.Qurbanov növbəti rəqib "Bayer"lə oyunlar haqda bunları bildirib: "Hər oyunda daha ciddi olmalıyıq. Həmişə güclü rəqiblərə qarşı oynamaq istəmişəm. Bu, futbolçuların daha da böyüməsi üçün faydalıdır. "Bayer" Bundesliqada liderlərdən biridir. Çalışacağıq ki, öz oyunumuzu göstərək. Ümid edirəm ki, yaxşı oyun nümayiş etdirəcəyik".

O, Bədəvi Hüseynovun zədə aldığını bildirib: "Onun əzələsində müəyyən zədə oldu. Bu səbəbdən onu əvəzlədik. Maksim Medvedevin rəqibin topu qapıdan keçirməsinə mane olması isə bizi sevindirir".

Baş məşqçi isveçli jurnalistin təxribat ehtimalı ilə bağlı sualına da cavab verib: "Əksinə, təxribat olanda biz daha da inamlı çıxış etmişik. Təxribat qorxaqlıq əlamətidir. Biz peşəkarıq. Oyunumuzda bunu qoruyub saxlamalıyıq. Biz həmişə başı dik olmuşuq. Ancaq burda belə bir hal olmadı. Hoteldə də bunu hiss etmədik. Bu bizi sevindirdi".