"Hər 2 komanda üçün çox vacib oyundur. 0:4 hesablı məğlub olmaları bəlkə də hamıda başqa fikir formalaşdırıb. Topa yiyələnmə, kombinativ futbol nümayiş etdirirlər. Diqqətli olmalıyıq. Ümid edirəm ki, sabah futbolçularım bunu bacaracaq".
Prosport.Az-ın İsveçin Yötebory şəhərinə ezam olunmuş əməkdaşının verdiyi xəbərə görə, bunu "Qarabağ"ın baş məşqçisi UEFA Avropa Liqasının qrup mərhələsinin "Hekken"lə oyunundan öncə keçirilmiş mətbuat konfransında Qurban Qurbanov deyib.
O, İsveçin "Dagens Nyheter" mətbuat orqanının əməkdaşı olan jurnalistin "Dağlıq Qarabağdan köçün başlanması komandaya nə dərəcədə təsir edir?" sualına belə cavab verib: "Qarabağda yaşayan digər ölkənin nümayəndələri idi. İndi artıq onlar öz ölkələrinə gedirlər. Onlar üçün rahat şərait yaradılıb. Onlara su, ərzaq verilir. Torpaqlarımızın qayıtması ilə artıq biz özümüzü rahat hiss edirik. Qarabağ Azərbaycanın olub və Azərbaycanın olacaq".
Qurban Qurbanov daha sonra isveçli jurnalistin klubun bu yerə necə gəlməsi ilə bağlı sualına aydınlıq gətirib: "Klub olaraq məqsədimiz Avropada yaxşı nailiyyətlər qazanmaqdır. Minimum stabilliyi qoruyub saxlamaq istəyirik. Klub olaraq çox əziyyət çəkdik. İndi də bu əziyyətin bəhrəsini görürük. Ancaq bu o demək deyil ki, biz böyük uğur əldə etmişik. Bəzən bizdən asılı olmayan reallıqlar üzündən, daha da yaxşı nəticələr əldə edə bilməmişik. Konkret olaraq bu mövsüm Avropada hədəfimiz mümkün qədər irəliləməkdir".
Ağdam komandasının baş məşqçisi İsveçdə mümkün təxribatla bağlı suala belə cavab verib: "Hər hansısa təxribatın olması mümkündür. Biz buna hazır olmalıyıq. Bu o demək deyil ki, biz kimdənsə qorxuruq, kimdənsə çəkinirik. İstənilən təxribata biz öz reaksiyamızı göstərmişik. Belə təxribatlara biz qorxaqlıq kimi baxırıq. Reaksiya verməli deyilik. Ancaq bəzən buna reaksiya vermək məcburiyyətində qalırıq".
Təcrübəli çalışdırıcı bildirib ki, bu matçda 1 xal da onlara oyunun gedişindən asılı olaraq sərf edə bilər: "1 xal da bizə sərf edəcək. Amma oyun zamanı daha dəqiq bilinəcək ki, 1, yoxsa 3 xal bizə daha çox sərf edəcək".
UEFA Avropa Liqasının qrup mərhələsinin "Hekken" (İsveç) – Qarabağ" görüşü sabah keçiriləcək. "Ullevi" stadionunda keçiriləcək görüş saat 23:00-da başlayacaq.