Ötən aydan "Kəpəz"in düşərgəsində olan portuqaliyalı qapıçı İqor Rodriqesin klubla münasibətlərini niyə rəsmiləşdirə bilməməsinin səbəbi bəlli olub.

Bu barədə Prosport.Az-ın Gəncəyə ezam olunmuş əməkdaşına 28 yaşlı qapıçının özü məlumat verib.

2017-2020-ci illərdə "Benfika"ya məxsus olmuş futbolçu bildirib ki, hazırda transfer haqları olan sənədləri son çıxış etdiyi Portuqaliyanın "Feyrensi" klubundadır. Transfer pəncərəsi dönəmi bağlandığından, onun sərbəst futbolçu kimi müqavilə bağlaması üçün bu sənədlərin "Kəpəz"ə göndərilməsi lazımdır. Hazırda bu səbəbdən onun "Kəpəz"lə müqavilə bağlaması yubanır. İqor Rodriqes qeyd edib ki, bu həftə ərzində Gəncə klubu ilə müqavilənin bağlanması gözlənilir.

Qeyd edək ki, dünən Azərbaycan Premyer Liqasının VIII turunun "Kəpəz" – "Qəbələ" (0:1) oyununu tribunadan izləyənlər arasında İqor Rodriqeslə yanaşı, Fransanın "Nant", "Soşo" kimi klublarında çıxış etmiş, Mali millisinin sabiq forvardı Adama Nyan da olub. Onunla da hələ ki müqavilə imzalanmayıb.