"Mənim barədə artıq qərar çıxıb. Sözsüz ki, qərar xoşuma gəlmədi. Çünki 2 oyunu buraxmalı olacağam".

Bunu Prosport.Az-a açıqlamasında "Qəbələ"nin məşqçisi Rasim Ramaldanov deyib.

37 yaşlı məşqçi Azərbaycan Premyer Liqasının VII turunun "Qarabağ"la bağlanış matçının (1:2) 42-ci dəqiqəsində meydançaya daxil olaraq rəqibin kolumbiyalı mərkəz müdafiəçisi Kevin Medinaya qarşı aqressiv şəkildə təzyiq göstərdiyi üçün baş hakim Elçin Məsiyev tərəfindən birbaşa qırmızı vərəqə ilə texniki zonadan kənarlaşdırılıb. Bu səbəbdən də vaxtı ilə millimizin mərkəz müdafiəçisi olmuş Ramaldanov AFFA İntizam Komitəsi tərəfindən 2 oyunluq cəzalandırılıb, "Qəbələ" isə 1000 manat cərimələnib.

Lakin Rasim Ramaldanov bu qərarla razı deyil: "O qədər belə şey olub ki. Dava epizodunda hamı meydançaya futbolçuları aralamağa çıxıb. Məndə də avtomatik olaraq bu, baş verdi. Nə bilim. Əgər bu hərəkəti həqiqətən qırmızı vərəqə kimi görürlərsə, onda deməyə sözüm yoxdur".

Premyer Liqanın V turunun "Zirə" ilə matçında baş məşqçi Elmar Baxşıyev və VI turun "Turan Tovuz"la oyununda məşqçi Xaqani Məmmədovun qırmızı vərəqə aldığını nəzərə alsaq, hakimlərin "Qəbələ"nin texniki zonasında yer alan səlahiyyətli şəxslərlə arasının elə də yaxşı olmadığını düşünmək olar. Ardıcıl 3 məşqçiyə qırmızı vərəqə verilməsinə Rasim Ramaldanovun cavabı belə oldu:

"Bu suala cavab verməyə çətinlik çəkirəm. Bu bir qismətdir. Olmalı idi və oldu".

Səbuhi Musa