Bu il Bakıda keçirilməsi planlaşdırılan boks üzrə 22 yaşadək Avropa çempionatının təşkilatçılığı Azərbaycanın əlindən alınıb.

Prosport.Az-ın məlumatına görə, yarış 10-21 noyabr tarixlərində Monteneqronun Budva şəhərində keçiriləcək. Bu barədə Avropa Boks Konfederasiyasının (EUBC) yarışların təşkili üzrə serbiyalı meneceri Draqolyub Radoviç paylaşım edib.

Yarışın Azərbaycandan alınmasında erməni faktorunun olması istisna edilmir. Çünki bununla bağlı Ermənistan Boks Federasiyasının prezidenti Ohannes Ovsepyan öz "Facebook" səhifəsində paylaşım edib:

“Azərbaycanın törətdiyi son təcavüz və müharibəni nəzərə alaraq, Ermənistan idmançılarının vəziyyəti və təhlükəsizliyini nəzərə alaraq, yarışın keçiriləcəyi yeri dəyişdirmək xahişi ilə Avropa Boks Konfederasiyasına müraciət etdim".

Monteneqro mətbuatı isə bunun səbəbini Azərbaycanın vaxtında müqavilə bağlamaması və lazımi şərtləri təqdim etməməsi ilə əsaslandırır. Böyük ehtimalla, "lazımi şərtlər" dedikdə ermənilərin tələb etdiyi təhlükəsizlik zəmanətinə dair məktub nəzərdə tutulur. Dəyişikliyin belə tez baş tutmasında EUBC-nin prezidentinin yunan Yoannis Filippatosun olması da mümkün rol oynayıb.

Ancaq sual doğur. Əgər ermənilər özlərinə dair təhlükəsizlik istəyirsə, Azərbaycan tərəfi niyə Ermənistanın paytaxtı İrəvanda 21 noyabr – 5 dekabr tarixlərində keçiriləcək gənclərin dünya çempionatı üçün zəmanət məktubu istəmir? Və ya müharibə şəraiti nəzərə alınırsa, o zaman İrəvandakı dünya çempionatı niyə ləğv edilmir? Gənclər və İdman Nazirliyi və Azərbaycan Boks Federasiyası bu məsələyə müdaxilə edib, öz mövqeyini ortaya qoymalıdır. Əmək və əhalinin sosial müdafiə naziri Sahil Babayevin rəhbəri olduğu bizim federasiya isə susur.

Qeyd edək ki, bu ilin yanvarında Avropa Boks Konfederasiyası İtaliyanın Assizi şəhərində keçirilmiş səsverməyə görə Azərbaycan Bolqarıstan və Rumıniyanı qabaqlayaraq yarışa ev sahibliyi hüququ əldə etmişdi.