Neftçi” PFK-nın yeni strukturu təsdiqlənib.
Prosport.Az xəbər verir ki, kluba əvvəlki tək Müşahidə Şurası rəhbərlik edəcək, klubun baş icraçı direktoru isə Fərrux Mahmudov olacaq. Müşahidə Şurası sədri Rövşən Nəcəfin idman üzrə müşaviri vəzifəsini isə artıq futbol meneceri Kamil Məmmədov yerinə yetirəcək.
Strukturda yeni departamentlər qruplaşdırılıb. İdman direktoru vəzifəsinin isveçli mütəxəssis Yens Andersona tapşırıldığı bəlli idisə, administrativ işlər üzrə direktor vəzifəsini Səbuhi Rzayev, maliyyə üzrə direktor vəzifəsini Namiq Əlizadə icra edəcək.
“Neftçi” PFK-nın Media, marketinq və ictimaiyyətlə əlaqələr departamenti kommersiya və kommunikasiyalar üzrə 2 hissəyə ayrılıb. Kommersiya üzrə direktor Rüstəm Allahverdiyev, kommunikasiyalar üzrə direktor isə Aysu İbrahimli olacaq.
Yenilənmiş struktur daha da mərkəzləşdirilib. Bu struktura əsasən, departamentlər baş icraçı direktora tabedir, baş icraçı direktor isə müvafiq olaraq Müşahidə Şurasına hesabat verəcək.
Qeyd edək ki, dünən Elnur Eyvazovun "Neftçi"nin vitse-prezidenti postundan göndərildiyi məlum olmuşdu.