“Bayer” nəhəng klubdur, lakin biz onlardan çəkinmirik”.

Prosport.Az xəbər verir ki, bunu “Qarabağ”ın futbolçusu Juliu Romau UEFA Avropa Liqasının qrup mərhələsindəki rəqibləri olan “Bayer” (Leverkuzen) haqda danışarkən deyib.

Yarımmüdafiəçi Braziliya mətbuatına verdiyi açıqlamasında Bundesliqa təmsilçisi ilə matçlara qələbə əzmi ilə çıxacaqlarını söyləyib: “Rəqib güclü olsa da, 3 xal qazanmağa, öz oyunumuzu göstərməyə çalışacağıq. Buna nail olacaq səviyyədə komandamız var. Avropa Liqası xüsusi yarışdır və hər bir futbolçu bu turnirin oyunlarında meydanda olmaq istəyir”.

Ağdam klubunun legioneri qrup mərhələsinin ilk turunda Norveçin “Molde” klubunu 1:0 hesabı ilə məğlub etdikləri görüşə də münasibət bildirib: “Qələbə ilə başlamaq həmişə önəmlidir. Bu, şübhəsiz ki, gələcəkdə bizə kömək edəcək. Eyni diqqətlə yolumuza davam etməliyik”.

Qeyd edək ki, “Qarabağ” ll turda səfərdə İsveçin “Hekken” klubu ilə qarşılaşacaq. Matç oktyabrın 5-də Yöteborq şəhərində keçiriləcək.