"Sabah" Azərbaycan Premyer Liqasının Vll turunda doğma meydanda "Kəpəz"lə 2:2 hesablı heç-heçə edib. 

Prosport.Az xəbər verir ki, Masazır təmsilçisinin baş məşqçisi Murad Musayev matçdan sonra keçirilən mətbuat konfransında jurnalistlərin suallarını cavablandırıb:

– Demək olar ki, rəqibdən hər cəhətdən üstün idik. Oyuna nəzarət bizim tərəfimizdə idi. Rəqibin heç 1 qol fürsəti olmadı, amma heç nədən 2 qol vurdular. Bu da əlbəttə ki, bizim problemimizdir. Təhlil edəcəyik.

– Nicat Mehbalıyev haradadır?
– Əvəzedici komanda ilə məşq edir.

– Səbəb nədir?
– Bu suala rəhbərlik cavab verməlidir.

– Rəqib oyunçuların tez-tez yerdə qalmasına etiraz edirdiniz. Artırılan 8 dəqiqə sizi qane etdi?
– Əlbəttə ki, hakimlikdən ümumiyyətlə məmnun deyiləm. Rəqib futbolçular oyunun bərpasını gecikdirirdilər, yerdə uzanırdılar. Belə davam edəcəksə, Azərbaycan futbolu inkişaf etməyəcək. 1 xal üçün bunları etmək düzgün deyil. Mənim komandam nə vaxtsa belə oyun sərgiləsə, futbolu atıb gedib başqa işlə məşğul olaram. Futboldan zövq almaq lazımdır. 1 il əvvəl eyni şeyləri "Şamaxı" edirdi. Bəlkə də bu cür davranışlar etməsəydilər, I Liqaya düşməzdilər.

– "Qarabağ"la matçdan sonra demişdiniz ki, 1 qələbə motivasiyamızı yüksəldəcək. "Kəpəz"lə görüşdə bunu bacarmadınız. Bu durum sizi qorxutmur?
– Qorxudur. 

– Bəs nə düşünürsünüz?
– Düşünürəm ki, bu gün qələbə qazanmalıydıq, amma bunu edə bilmədik.

– Yusif İmanovda bəlkə arxayınlıq olub. Buna görə onu ehtiyatda saxladınız?
– Rəqabəti daha da artırmaq üçün belə qərar verdik. Çünki Yusif rahatlaşmışdı. Ona limitə görə imkan verdik, oynadı. Məğlubiyyətin günahkarı sadəcə Rüstəm Samiqullin deyil.

– VAR-a baxılanda sanki, köməkçinizə dediniz ki, penalti yoxdur...
– Çox qəribə bir hal idi. Penalti epizodunda hakim 2 metrdən görmürdü ki, VAR-a gedirdi? İnqilab Məmmədov həmişə bizim oyunda hakim olanda özündən nələrsə çıxarır. İstəməzdik ki, bu hakim bizim matçlara təyinat alsın.