"Qərara gəldik ki, çoxdandır Azərbaycan futbol azarkeşləri Fatih Terimlə görüşmək istəyir. Burada çoxlu "Qalatasaray" azarkeşləri var. Azərbaycana məşhur müğənnilər gətirilir. Amma insanların motivasiya ala biləcəyi, onun uğurundan ilham alına biləcək insanlar Bakıya dəvət olunmur. Bu baxımdan biz düşündük ki, Fatih Terim futbolsevərlərin ən çox sevdiyi şəxslərdən biridir".

Bunu Prosport.Az saytına "Bəylimedia" və "Excevent" şirkətinin təsisçisi və baş direktoru Şəhriyar İmanbəyli deyib.

O, Fatih Terimin Bakıya dəvət olunmasının İstanbul ofisinin vasitəsilə baş tutduğunu bildirib: "Bizim 5 ölkədə ofisimiz var. Bunlardan biri də Türkiyədədir. Məhz bu səfərin təşkili sırf İstanbul ofisimizin təşəbbüsü ilə baş tutub. Təxminən Terimlə 2-3 ay danışıq olub. Nəticədə onun Azərbaycana gəlişi ilə bağlı bir tarix ala bildik".

Şəhriyar İmanbəylinin sözlərinə görə, biletlər sürətlə satılır: "Bugünədək Azərbaycanda bu tip seminar olmayıb. Qiymətlər 35 manatdan başlayır. Düşünürəm ki, qiymət o qədər də baha deyil. Biletlər iTicket.az saytında satılır. 3000-3300-lük zaldır. Biletlər hazırda sürətlə satılır. Zalın tam dolacağını gözləyirik".

Şirkət rəhbəri 17 iyun saat 19:05-də Bakı Konqres Mərkəzində başlayacaq seminar barədə də məlumat verib: "Terim orada uğur hekayəsini, müvəffəqiyyətinin sirlərindən danışacaq. Düşünürəm ki, bu, gənclərin və iş adamlarının motivasiya ala bilməsi üçün faydalı seminar olacaq. Seminarın başlanma vaxtının 19:05 olması isə təsadüfi deyil. Bildiyiniz kimi, "Qalatasaray" klubunun yaranma tarixi 1905-ci ildir. Bu səbəbdən seminarın başlanma tarixini simvolik olaraq belə seçdik".

Qeyd edək ki, seminar təxminən 2 saat davam edəcək. Seminar üçün ən ucuz biletlər 35, ən bahalılar 270 manat təşkil edir.

Səbuhi Musa