Heydər Əliyevin anadan olmasının 100 illiyinə həsr olunmuş dövlət qurumları arasında təşkil olunan minifutbol turnirinin final oyunu keçirilib.

Prosport.Az xəbər verir ki, bu gün final oyununa çıxan Fövqəladə Hallar Nazirliyinin (FHN) komandası Dövlət Təhlükəsizliyi Xidmətinin komandası ilə qarşılaşıb. Gərgin idman mübarizəsi şəraitində keçən və əsas hissəsi 0:0 bərabərliklə bitən oyunun qalibi penalti seriyasında müəyyənləşib.

Rəqib qapısından 8 top keçirən FHN komandası 8:7 hesabı ilə qalib gələrək turnirin çempionu olub. SOCAR isə Dövlət Gömrük Komitəsi komandasına qalib gələrək bürünc medal qazanıb. Çempion komandaya kubok və medalları, habelə 2-ci və 3-cü yeri tutmuş komandalara medalları fövqəladə hallar naziri general-polkovnik Kəmaləddin Heydərov və digər rəsmilər təqdim edib.

Qeyd edək ki, Heydər Əliyevin 100 illik yubileyinə həsr olunan və 18 noyabrda start götürmüş 52 dövlət qurumunun komandasının iştirak etdiyi minifutbol turniri Gənclər və İdman Nazirliyi, AFFA və Azərbaycan Minifutbol Federasiyasının dəstəyi ilə keçirilib. FHN komandası 19 qələbə, 1 oyunu bərabərə bitirməklə məğlub olmadan ən çox qələbə qazanan yeganə komanda kimi yarışı uğurla başa vurub.