"Matçın əvvəlində kapitanımız zədələndi və bu, bizim üçün böyük itki idi. Rəqibimiz isə ötən həftə “Cenevrə”yə qarşı oyunda məğlub olmuşdu və bizə qarşı aqressiv oynayacağı bəlli idi".

Prosport.Az xəbər verir ki, bu sözləri "LANDAU Layns" klubunun baş məşqçisi Ərhan Tokər FIBA Avropa Kubokunda "Benfika" 76:97 hesabı ilə uduzduqları oyundan sonra deyib.

Mütəxəssis məğlubiyyəti şərh edib: "Cey Ceyin zədəsi ilə yanaşı, Orelik Gediminasın da ardıcıl 3-cü oyunda zədəli olmasına baxmayaraq meydana çıxdığını qeyd etmək istərdim. O, ötən oyunda olduğu kimi, bu görüşdə də fədakarlıq nümayiş etdirdi. Lakin kifayət qədər məşq edə bilmədiyi üçün performansında müəyyən eniş hiss olunur. Buna baxmayaraq, hazırkı vəziyyəti ilə belə, komanda üçün mübarizə aparır.

Bütün bunları bir kənara qoysaq, foullardan lazımi şəkildə yararlana bilmədik. Oyuna da istədiyimiz kimi başlaya bilmədik. Zaman-zaman toparlanmağa çalışdıq. Yekunda, qeyd etdiyim bütün çətinliklərə baxmayaraq, qrupun ən güclü komandasına məğlub olduq. Oyunçularıma göstərdikləri mübarizəyə və fədakarlığa görə təşəkkür edirəm".