Səbuhi Musa yazır...

Meydana girən itlərdir. Oxşar hadisələr dünya futbolunda baş verir. Birində pişik, birində toyuq, birində xoruz meydana girir. Söhbət II Liqanın "Şəmkir" – "Kür-Araz" (İmişli) oyununun 2-ci hissəsində meydana girmiş və buna görə fasiləyə səbəb olmuş itlərdən gedir. Ancaq bu, kuryoz hadisəyə səbəb meydana girən itlərdir, ya stadiona baxmayan rəsmilər?

Meydanın durumuna baxanda bu sual düşündürür: Şəmkir Olimpiya İdman Kompleksinin stadionu sonuncu dəfə nə vaxt gübrələnib, nə vaxt arena sulanıb? Nazirlik rəsmiləri son dəfə nə vaxt bura təşrif buyurub? Axı, bu, özəl stadion yox, dövlətin balansında – Gənclər və İdman Nazirliyinin nəzdinə olan obyektin arenasıdır.

Bu qotur meydançaya görə kim məsuliyyət daşıyır? Bu biganəlik niyə davam edir? Niyə dövlət başçısının rəhbəri olduğu MOK bu məsələlərə qarışmır və ya qarışmaq imkanından məhrum edilib? Niyə dövlət başçısına bu məsələlər məruzə edilmir? Suallar çoxdur. Nazirlik rəsmilərinin başı isə çoxsaylı ezamiyyətlərə səbəb olan multiidman yarışlarından sonra istirahətə qarışıb.

Yaxşı ki PFL oyunları verir. Bəlkə bu vasitə ilə "Azərbaycan idman ölkəsidir" deyiminin altında gizlənənləri ölkə rəhbərliyi görüb müvafiq qərarlar verər.

P.S. Vallah, belə stadiona it də yolunu azıb girər. Nə bilsinlər ki, ora futbolun oynanıldığı meydançadır, ya adi otluq...