UEFA təhlükəsizlik səbəbindən 7 ölkə cütlüyünün bir-biri ilə qarşılaşmasını qadağan olunmuş elan edib.

Prosport.Az xarici mətbuata istinadən xəbər verir ki, bu siyahıya daha bir cütlüyün əlavə olunacağı gözlənilir.

UEFA Millətlər Liqasında keçirilən iki oyunda da göründüyü kimi, İrlandiya ilə İsrail arasında münasibətlər kifayət qədər gərgindir. Hətta İrlandiya millisinin baş məşqçisi Heymi Hallqreymsson UEFA-ya müraciət edərək qarşıdakı beynəlxalq turnirlərdə bu iki komandanın püşkatma zamanı eyni qrupa düşməsinin qarşısının alınmasını istəyib.

İki ölkə arasındakı gərginliyin əsas mərhələsi 2024-cü ildə, münasibətlərin pisləşməsi fonunda İsrailin Dublindəki səfirliyini bağlaması ilə başlayıb. Bundan qısa müddət sonra İrlandiya Fələstin dövlətini tanıyıb. 2025-ci ildə isə Cənubi Afrikanın Beynəlxalq Ədalət Məhkəməsində İsrailə qarşı qaldırdığı işdə onu dəstəkləyərək İsraili soyqırım törətməkdə ittiham edib. 2026-cı ildə İrlandiya İsrail hökumətinin nazirləri Bezalel Smotriç və İtamar Ben-Qviri ölkəyə buraxmayıb.

İki ölkənin milli komandaları arasındakı hər iki oyun neytral meydanlarda – Macarıstan və Serbiyada keçirilib. Mövcud vəziyyət nəzərə alınaraq, İrlandiya ilə İsrailin yaxın gələcəkdə yenidən qarşılaşmaması və bu cütlüyün də “qadağan olunmuş” cütlüklər siyahısına daxil edilməsi ehtimalı yüksək qiymətləndirilir.

Hazırda siyahıda yer alan 7 cütlükdən biri də Azərbaycan – Ermənistan cütlüyüdür. Bildirilir ki, təxminən 30 ildən sonra Azərbaycan ərazi bütövlüyünü bərpa edə bilib. Bu müddətdə isə iki ölkənin yığmaları beynəlxalq turnirlərdə üz-üzə gəlməyib.

Üz-üzə gəlməsi qadağan olunmuş digər ölkələr isə İspaniya – Cəbəllütariq, Kosovo – Serbiya, Kosovo – Bosniya və Herseqovina, Kosovo – Rusiya, Rusiya – Ukrayna və Belarus – Ukrayna cütlükləridir.