"Kəpəz" Azərbaycan Premyer Liqasının V turunda "Araz-Naxçıvan"ı qəbul edib – 1:2.

Prosport.Az xəbər verir ki, Gəncə təmsilçisinin baş məşqçisi Azər Məmmədov matçdan sonra keçirilən mətbuat konfransında jurnalistlərin suallarını cavablandırıb. Sizi mütəxəssisin fikirləriylə tanış edirik:

"Oyunun əhəmiyyətini bilirdik. Çempionatda "Araz-Naxçıvan" əsas rəqibimizdir. Bu matç bizim üçün 6 xallıq idi. Təəssüf ki, 6 xalı "Araz-Naxçıvan"a verdik. 2 fərqli hissə izlədik. İlk yarıda 5 dəqiqəyə 2 top buraxdıq. Qollar öz səhvlərimizdən oldu. Bundan sonra komanda toparlanmaqda çətinlik çəkdi. 2-ci hissədə futbolçular fərqi aradan qaldırmağa çalışdı. Hər şeyə rəğmən mövsüm yeni başlayıb. Qarşıda uzun marafon var. İşləmək lazımdır. Hücumda dişsizlik görünür. Çalışacağıq ki, milli fasilədə çatışmazlıqları aradan qaldıraq".

– Bu gün 2-ci hissədə bəlkə də mövsümün ən yaxşı oyununu keçirdiniz. Hətta "Neftçi"yə qalib gəldiyiniz, "Qarabağ"la heç-heçə etdiyiniz oyunda bu cür çıxış etməmişdiniz. Bu fikirlə razısınız?
– Razıyam. "Neftçi" ilə matçda çempionat yeni başlamışdı. Artıq oyunçular bir-birinə uyğunlaşıb. Getdikcə daha fərqli futbol oynamağa çalışırıq. Ancaq nəzərə alaq ki, rəqib də nə "Neftçi", nə də "Qarabağ" idi. Gəncədə məğlub olmamalıydıq. Heç-heçə pis nəticə olmazdı.

– Penaltidən qolu vuran Mate Kvirkiyanın start heyətində olmamasının səbəbi nədir?
– "Turan Tovuz"la matçda zədələnmişdi. Uzun müddət idi ki, komanda ilə məşq etmirdi. Onun gücü hələ 45 dəqiqəlik deyil. 30 dəqiqə oynatmağı düşünürdük. Hücumda axsama gördük. Buna görə də Mateni meydana buraxdıq.

– Transfer məsələləri nə yerdədir?
– Baxışda 2 futbolçu var. 2-si də hücum oyunçusudur. Bəyənsək, müqavilə imzalayacağıq. "Araz-Naxçıvan"la matça hazırlaşırdıq deyə onlara çox da baxa bilmədik.