"Qəbələ"nin baş məşqçisi Elmar Baxşıyev Azərbaycan Premyer Liqasının V turunun "Zirə" ilə oyunundan sonra mətbuat konfransı keçirib.
Prosport.Az-ın Qəbələyə ezam olunmuş əməkdaşının verdiyi məlumata görə, konfransda aşağıdakı fikirlər səsləndirilib.
– Bilirdik ki, ağır oyun gözləyir bizi. "Zirə" yaxşı təşkilatlanmış komandadır. Bu tura kimi enişli oyun nümayiş etdirsək ki, komanda dinamika və əzmkarlıq baxımından göstərdi ki, bizi silmək olmaz. Getdikcə daha məzmunlu və hücumameyilli futbol sərgiləyəcəyik. İstirahət edib qarşıdakı matçlara hazırlaşacağıq.
– Rəşad Sadıqova da bu sualı verdik. "Qbələ" ötən mövsüm də "Zirə"ni məğlub edirdi, bu gün də qalib gəldiniz. Demək olar ki, Rəşad Sadıqov sizinlə bacarmır?
– Mən də Rəşad Sadıqov kimi cavab verəcəyəm. Meydanda Rəşadla Elmar oynamır, komandalar oynayır. Bu gün hər iki komanda qələbə qazana bilərdi. Komandadan meydanda istədiyimi aldım.
– Qırmızı vərəqə aldığınız epizodu necə şərh edərdiniz?
– Emosiya ilə bağlıdır. Hakimlər bizim sözlərimizə dərhal fikir verməməlidir. Biz də oyunun içindəyik. Emosiyalarımızı göstərdim.
– Ehtiyatda oyunu gücləndirəcək futbolçu yoxdur. Transfer gözlənilir?
– Heyətimiz say olaraq geniş görünsə də, oyuna təsir edəcək futbolçuların sayı azdır. Güclənməyə ehtiyacımız var. Rəhbərliklə danışığımız olub, bir futbolçu transfer edəcəyik.
– Üsamə Xalaylanın oynamamasının səbəbi nədir? Hər hansısa narahatlığı var?
– Xeyr, narahatlığı yoxdur. Mənim prinsiplərim var. Futbolçular buna uyğunlaşmalıdır. Özü niyə oynamamasının səbəbini bilir. Rejimlə bağlıdır.
– Rəşad Sadıqov bildirdi ki, bu dönəmdə "Qəbələ" ilə qarşılaşmaq istəməzdim. Bəs siz necə düşünürsünüz? Ardıcıl məğlubiyyətlərdən sonra liderlə oynamaq çətin deyildi?
– Bizim "Zirə" ilə bütün oyunlar dinamik keçir. Hər iki komanda mübarizə baxımından bir-birinə layiqdir. Azarkeşlər sürətli oyun izlədilər.
– Ardıcıl məğlubiyyətlərdən sonra rəhbərliklə görüşünüz olmuşdu?
– Rəhbərliklə hər gün görüşürəm, məşqlərimizdə iştirak edirlər. Mediada yazılanlar məni təəccübləndirmir. 4 oyun uduzmağımıza baxmayaraq, rəhbərliyin dəstəyini hiss etmişəm. Əgər görsəm ki, bacarmıram, özüm gedəcəyəm. İstefa haqda düşünməmişəm. Mənə inanıb ora təyin edən adam olub. Mənim rəhbərim var. Mən ona inanıram, o da mənə inanır.
– Transfer edəcəyiniz oyunçunun adı bəllidir?
– Ad olaraq deyə bilmərəm. 2 aydır maraqlandığımız futbolçular var ki, son anda transfer alınmayıb. Ümid edirəm ki, milli fasilə zamanı istədiyim oyunçunu tapacağıq.