"Zirə"nin baş məşqçisi Rəşad Sadıqov Azərbaycan Premyer Liqasının V turunun "Qəbələ" ilə səfər matçından sonra mətbuat konfransına çıxıb.

Prosport.Az-ın Qəbələyə ezam olunmuş əməkdaşı həmin konfransda səslənən fikirləri təqdim edir:

– Maraqlı və gərgin oyunun şahidi olduq. Hər iki komanda qələbə üçün mübarizə aparırdı. Standart vəziyyətdən qol buraxdıq. İlk hissədə qoldan sonra reaksiya verə bilmədik. 2-ci hissdə fərqli "Zirə" gördük. Sadəcə olaraq son vuruşlarda dəqiqlik çatmadı. Buradan 1 xalla ayrıla bilərdik. Məyusuq.

– Ötən mövsüm "Qəbələ"yə 4 oyunun 2-də uduzmuşdunuz. Rəşad Sadıqov Elmar Baxşıyevlə bacarmır, yoxsa "Zirə" "Qəbələ" ilə?
– Ümumiyyətlə "Qəbələ" mövsümdə oyunlarımız nəticə baxımından uğursuz alınır. Elə matçlar olub ki, açıq-aşkar üstün oynayırdıq. Bu gün seçimim olsaydı, "Qəbələ" ilə qarşılaşmaq istəməzdim. Bilirdik ki, rəqib son döyüşə çıxacaq. İstəkli idik, növbəti qələbəni qazanmaq isyəyirdik. Alınmadı, təhlil edəcəyik. 

– İlkin Muradovun əsas komandada olmamasının səbəbi nədir? Onu cəzalandırmısınız?
– Cəzalandırmaq deməzdim. İlkin komandamızdadır. Performansı ilə bağlı belə qərar var. Növbəti turlarda meydanda da görə bilərik, komandadan gedişini də görə bilərik.

– Onun problemi nədir?
– Elə məsələlər var ki, media qarşısında danışa bilmərik. Bəzi problemlər var. Çözməyə çalışırıq.

– Qismət Alıyevə meydanda hansı tapşırıq vermişdiniz?
– Bilirdik ki, keçmişdə bu mövqedə oynayıb. İsmayılın itkisindən sonra yerli oyunçu ilə bağlı problem yaşayırıq. Buna görə belə qərar verdik. Yaxşı oynayırdı.

– Milli komandaya "Zirə"dən kimlərin çağırılacağını gözləyirsiniz?
– Yəqin ki, bizdən çağırılanlar əsas heyətdə oynamayacaq. Mən məşqçi olaraq istəyərdim ki, getməsinlər, bizimlə birlikdə hazırlaşsınlar. Amma çağırsalar da, futbolçular canla-başla gedəcək.