Bu gün futbol üzrə Azərbaycan Premyer Liqasında V tura start verilib.

Prosport.Az xəbər verir ki, ilk oyun günündə bir qarşılaşma baş tutub. Belə ki, paytaxtın "Sabah" komandası doğma meydanda "Turan Tovuz"u qəbul edib.

İlk hissədə qonaqlar daha üstün oyun nümayiş etdirib. Məhz bunun nəticəsində görüşün 19-cu dəqiqəsində hesab açılıb. "Turan Tovuz"un heyətində Panama millisinin müdafiəçisi Roderik Miller fərqlənib. İlk hissə qonaqların 1:0 hesablı qələbəsi ilə başa çatıb.

Rauf Cabbarovun idarə etdiyi matç 2-ci hissədə də maraqlı keçib. Belə ki, ilk qoldan ilhamlanan Tovuz təmsilçisi 56-cı dəqiqədə "Bank Respublika Arena"da 2-ci qolun sevincini yaşayıb. Bu dəfə qonaqların digər müdafiəçisi Şəhriyar Əliyev başla fərqlənib. Lakin bu da oyunda son nöqtə olmayıb. Belə ki, "Turan Tovuz"un heyətində 79-cu dəqiqədə albaniyalı Belaydi Pusi fərqlənib. Qonaqlar bununla da hesabı 3:0-a çatdırıb. Bu qoldan sonra oyunda hesab dəyişməyib.

Bu görüşdən sonra xallarının sayını 9-a çatdıran "Turan Tovuz" turnir cədvəlində 2-ci pilləyə yüksəlib. 4 xalı olan "Sabah" isə 6-cı sıradadır.

Qeyd edək ki, turun digər görüşləri sabah və sentyabrın 3-də keçiriləcək.