Bakıda keçiriləcək futbol üzrə U-15 dünya çempionatı və festivalında iştirak edəcək komandaların mübarizə aparacağı qruplar müəyyənləşib.

Prosport.Az xəbər verir ki, Azərbaycan millisi AF qrupunda yer alıb. Yığmamız Andorra, Avstraliya, Haiti, İsrail və Şərqi Timorla mübarizə aparacaq.

Ümumilikdə turnirdə 191 komanda 32 qrupda mübarizə aparacaq. Yarışın ilk oyunları 24 oktyabrda, final qarşılaşmaları isə 30 oktyabrda keçiriləcək.

Turnirdə komandalar 8x8 formatında qarşılaşacaq. Oyunlar 20 dəqiqəlik iki hissədən ibarət olacaq. Qrup mərhələsinin yekunlarına əsasən, iştirakçılar 6 performans səviyyəsinə bölünəcək və bütün komandalar turnirin son gününədək mübarizəni davam etdirəcəklər.

Yarışda komandalar 68x47 metrlik meydançalarda mübarizə aparacaq. Qarşılaşmalar 7,32×2,44 metr ölçülü standart qapılarla keçiriləcək.

Hər komandanın heyətində 14 futbolçu, texniki heyətdə isə 6 nəfərədək məşqçi və digər komanda rəsmisinin yer alması nəzərdə tutulur. Turnirdə 2011 və ya 2012-ci il təvəllüdlü futbolçular iştirak edəcək. Ümumilikdə isə Azərbaycanda keçiriləcək festivalda 3 000-dən çox gənc futbolçu, məşqçi və rəsmi şəxsin iştirakı gözlənilir.

Təsnifat mərhələsində komandaların dairəvi sistem üzrə 4-5 oyun keçirməsi nəzərdə tutulur. Bu matçların nəticələrinə əsasən komandalar turnirin növbəti mərhələsində müvafiq səviyyələr üzrə mübarizəni davam etdirəcəklər.

Yarış çərçivəsində ümumilikdə 1000-ə yaxın oyun keçiriləcək. Qarşılaşmaların böyük hissəsi Hövsan Yarış Kompleksində, açılış və final oyunları isə Bakı Kristal Zalında təşkil olunacaq.

Qeyd edək ki, FIFA U-15 dünya çempionatı və festivalı ilk dəfə Azərbaycanda keçiriləcək.